Dy persona të vrarë nga një përleshje me armë në Florida përpara festës së Halloween-it, njerëzit në panik filluan të iknin kur dëgjuan të shtënat

Dy persona janë vrarë dhe 18 të tjerë janë plagosur pas të shtënave të dielën në mëngjes në Tampa të Florida-s. Incidenti ndodhi pas një “përleshjeje mes dy grupeve”.

Oficerët ishin të pranishëm kur incidenti ndodhi pak para orës 3 të mëngjesit në lagjen Ybor City të Tampa-s, raporton CNN, përcjell Telegrafi.

Derisa qindra njerëz u larguan nga baret dhe klubet e natës në Ybor City, një natë me plot gjallëri e së shtunës shpejt u kthye në natë vdekjeprurëse.

Ishte një nga disa të shtënat që ndodhën mes festimeve në të gjithë vendin këtë fundjavë përpara Halloween-it.

Pamjet e publikuara nga mediet e huaja tregojnë momentin kur ndodhën të shtënat, derisa njerëzit me kostume filluan të vraponin në panik.

“Njerëzit ishin jashtë në natën e së shtunës. Është ora tre, ka qindra njerëz në rrugë”, tha Lee Bercaw, shefi i policisë në Tampa

Autoritetet besojnë se ishin të përfshirë së paku dy të armatosur.

Nuk është ende e qartë nëse 18 personat e plagosur në incident pësuan plagë me armë zjarri apo lëndime të tjera.

Autoritetet thanë se ata e dinë se ekzistonte një “shqetësim ose problem midis dy grupeve” dhe një burrë i paidentifikuar që ata besojnë se ishte i përfshirë në incident, “është dorëzuar dhe detektivët po e intervistojnë atë tani”. /Telegrafi/