Drita sot nis aventurën evropiane, ku do të luaj për herë të parë në fazën e Ligës në Ligën e Konferencës.

Gjilanasit kanë marrë pjesë rregullisht në Evropë pas pranimit, përveç dy sezoneve dhe gjithmonë ishin afër të futeshin në fazën e grupeve.
Por këtë edicion më në fund qëllimi u arrit dhe Drita arriti të futet në fazën e grupeve (ligës) në një garë evropiane pas shumë
përpjekjesh e mos dorëzimi.
Të besuarit e trajnerit Zekirija Ramadani gjithmonë kanë shfaqur ndeshje të mira në Evropë, teksa synojnë që ta nisin mbarë edhe në fazën e Ligës në Ligën e Konferencës, ku kundërshtari i tyre i parë është skuadra finlandeze KuPS.

Ekipi

Drita ka shkruar historinë, duke u bërë për herë të parë pjesë e fazës së Ligës në ligën e Konferencës. Kampioni në fuqi i Kosovës, nën drejtimin e trajnerit Zekirija Ramadani, ka siguruar gjashtë ndeshje evropiane këtë edicion, tri në shtëpi dhe tri në udhëtim, duke përfaqësuar futbollin kosovar në një nivel të ri, atë që e ka bërë Ballkani për dy vite radhazi.

Rrugëtimi

Gjilanasit e nisën aventurën që nga raundi i parë kualifikues i Ligës së Kampionëve, ku eliminuan Differdangen e Luksemburgut (1-0 dhe 2-3). Në raundin e dytë u përballën me gjigantin danez Copenhagen, ku pësuan dy humbje (2-0 dhe 0-1).

Pas kësaj, Drita ra në Ligën e Evropës, por u eliminua nga FCSB me rezultat të përgjithshëm 6-3 (3-2 dhe 1-3). Shansi i fundit ishte “play-off”-i i Ligës së Konferencës, ku gjilanasit sërish u përballën me Differdangen, të cilin e mposhtën dy herë (2-1 dhe 0-1), duke siguruar kështu historinë.

Faza e grupeve – kundërshtarët

Në grup, Dritën e presin sfida të vështira kundër rivalëve me përvojë evropiane. Kampioni kosovar e nis aventurën në udhëtim ndaj KuPS në Tampere të Finlandës. Përveç kësaj, do të udhëtojë edhe në Irlandë përballë Shelbourne dhe në Spanjë kundër Rayo Vallecanos.

Ndërkohë, në “shtëpinë” e saj, Drita do të presë tre kundërshtarë të njohur: Omonian e Qipros, Shkëndijën e Tetovës dhe holandezët e AZ Alkmaar.


Synimi

Objektivi kryesor i Dritës është të shijojë sa më shumë këtë eksperiencë dhe të provojë të kalojë në fazën tjetër.

Nëse arrin të zë një nga 24 vendet e para, gjilanasit do të siguronin edhe dy ndeshje shtesë në Evropë dhe do të bëheshin skuadra e parë kosovare që kalon fazën e ligës (grupeve) në një garë evropiane.

Vlera e dy skuadrave

KuPS dhe Drita kanë përafërsisht një vlerë të njëjtë në tregun e transferimeve, rreth shtatë milionë euro.
Skuadra finlandeze vlerësohet 6,85 derisa Drita ka një vlerë prej 6,58.
Qendërmbrojtësi nga Bregu i Fildishtë, Ibrahim Cisse është lojtari me vlerën më të madhe te finlandezët pasi vlerësohet 600 mijë euro nga Transfermarkt.

Ndërkohë lojtarët tjerë më të shtrenjtë janë edhe Samuli Miettinen e Johannes Kreidl me nga 500 mijë, si dhe mesfushori kosovar Doni Arifi dhe sulmuesi finlandez Otto Ruoppi me nga 400 mijë.
Te Drita futbollisti me vlerën më të madhe është Albert Dabiqaj me 600 mijë euro.

Ndërkohë pas tij vjen kapiteni Rron Broja me vlerë 550 mijë, e dyshja Almir Ajzeraj e Egzon Bejtulai që vlejnë nga 500 mijë. Sulmuesi më i rrezikshëm i Dritës, Arb Manaj ka një vlerë prej 450 mijë eurove.

Ndeshja KuPS - Drita do të zhvillohet me fillim nga ora 18:45. /Telegrafi/

NdërkombëtareFutbollSport
telegrafi sport app