Lajme Kosovë

Rreth 300 mijë euro, dreka, udhëtime, takime: Ku shkuan paratë e Kosovës për lobim në SHBA?

Para 7 muajve

Nga korriku i vitit të kaluar deri në janar të këtij viti, Ministria e Punëve të Jashtme dhe Diasporës e Kosovës (MPJD) i ka paguar dy kompani rreth 277 mijë dollarë për lobim në SHBA.

Përveç shumës së paguar sipas marrëveshjes për lobim, kompanitë në pronësi të Afërdita Rakipit dhe Avni Mustafajt kanë deklaruar edhe shpenzime shtesë.

Shumica e shpenzimeve të deklaruara në ueb-faqen e Aktit të Regjistrimit të Agjentëve të Huaj (FARA) të Departamentit amerikan të Drejtësisë janë shfrytëzuar për ushqime, në ato që i kanë deklaruar si takime pune, dhe udhëtime.

Pjesa më e madhe e takimeve janë zhvilluar nëpër restorante të ndryshme në Prishtinë, edhe pse në kontratën e lobimit thuhet se ata do të ofronin këshilla strategjike dhe përfaqësim të MPJD-së “brenda Shteteve të Bashkuara”.

Shpenzimet gjashtëmujore të Afërdita Rakipit

Gjatë gjashtë muajve të parë të shërbimit si lobuese në SHBA, e kontraktuar nga Ministria e Punëve të Jashtme dhe Diasporës e Kosovës, Afërdita Rakipi raportoi mbi 12 mijë dollarë shpenzime. Shumë prej tyre janë dreka e darka pune në Prishtinë.

Shpenzimet gjashtëmujore të Avni Mustafajt

Gjatë gjashtë muajve të parë të shërbimit si lobues në SHBA, e kontraktuar nga Ministria e Punëve të Jashtme dhe Diasporës e Kosovës, Avni Mustafaj raportoi mbi 7.500 dollarë shpenzime. Disa prej tyre janë dreka e darka pune në Prishtinë.

Shpenzimet gjashtëmujore të Avni Mustafajt

Sipas kontratave njëvjeçare të nënshkruara më 26 qershor të vitit të kaluar, Rakipi dhe Mustafaj do të paguheshin nga 147 mijë euro për lobim në SHBA nga MPJD-ja për “avancimin e marrëdhënieve dypalëshe mes SHBA-së dhe Qeverisë së Kosovës”.

Pjesën më të madhe të kësaj pagese, ata e kishin pranuar në korrik dhe dhjetor të vitit të kaluar. Ndërsa, pjesën tjetër të pagesës parashihet se e kanë pranuar dikur gjatë këtij viti, por të dhënat nuk janë ende publike.

Pagesat e Kosovës për lobim në SHBA

Ministria e Punëve të Jashmte dhe Diasporës e Kosovës i pagoi rreth 257 mijë euro për lobim në SHBA gjatë gjashtëmujorit të fundit të vitit të kaluar. Lobuesit e kontraktuar ishin Avni Mustafaj dhe Afërdita Rakipi.

Lobuesit në SHBA detyrohen të dorëzojnë të dhëna çdo gjashtë muaj për aktivitetet e tyre, sipas Aktit të Regjistrimit të Agjentëve të Huaj (FARA) të Departamentit amerikan të Drejtësisë.

Për këtë arsye kompanitë e Rakipit dhe Mustafajt – Afërdita Rakipi Communication dhe Ambal LLC – i kanë të publikuara të gjitha shpenzimet e tyre nga korriku i vitit të kaluar deri në janar të këtij viti.

Kontratat e tyre kanë qenë të vlefshme deri në fund të qershorit të këtij viti. MPJD-ja nuk ka treguar për Radion Evropa e Lirë nëse kontrata me këto dy kompani është vazhduar dhe nuk është përgjigjur në asnjë nga pyetjet lidhur me këtë temë.

Përgjigje nuk kanë dhënë as Mustafaj, Rakipi dhe Qeveria e Kosovës deri në momentin e publikimit të artikullit.

Kompanitë e Afërdita Rakipit dhe Avni Mustafajt nuk kanë pasur asnjëherë kontratë tjetër lobimi të regjistruar në FARA. Dokumentet e publikuara në këtë agjenci tregojnë se gjatë periudhës korrik 2023-janar 2024 ata kishin arritur gjithsej gjashtë kontakte.

Rakipi i deklaroi dy kontakte, ndërsa Mustafaj katër. Takimin virtual me ndihmëssekretarin amerikan të Shtetit, James O’Brien, dhe zëvendësndihmës sekretarin e Shtetit, Gabriel Escobar, e kanë deklaruar të dy si të mbajtur më 13 tetor.

Lobimi gjashtëmujor i Avni Mustafajt në SHBA

E kontraktuar nga Ministria e Punëve të Jashtme dhe Diasporës e Kosovës për lobim në SHBA, Avni Mustafaj i bëri gjithsej katër kontakte përgjatë gjysmës së parë të kohëzgjatjes së kontratës së tij.

Kosova edhe në të kaluarën ka pasur kontrata lobimi. Që nga viti 1992, parti politike e institucione qeveritare kanë shpenzuar miliona euro për lobim në SHBA.