Dogana e Kosovës pranon 1,360 aplikime për pozitat e reja doganore – procesi përzgjedhës së kandidatëve drejt përfundimit

Dogana e Kosovës më 7 mars të këtij viti kishte shpallur konkursin për rekrutimin e oficerëve doganor.

Konkursi që ka qenë i hapur deri më 22 mars, kishte nxitur pakënaqësi tek qytetarët për shkak të kriterit të moshës që kishte parashtruar Dogana në këtë konkurs.

Pika 3 e këtij konkursi thoshte se aplikuesi duhet të jetë i moshës 18 deri në 30 vjeç.

E lidhur me këtë konkurs nga Dogana e Kosovës kanë thënë për Telegrafin se procesi është transparent dhe po zhvillohet në përputhje me rregullat dhe procedurat e përcaktuara.

“Konkursi për doganierë u shpall me 07.03.2024 për të gjithë aplikantët që përmbushin kriteret e përcaktuara në shpallje. Kriteri i moshës ka qenë një prej pikave të përmendura në konkurs, dhe është përfshirë me qëllim që të sigurohet një proces përzgjedhës sa më i drejtë dhe i balancuar sipas nevojave te Doganës”, ka thënë Adriatik Stavileci, zëdhënësi i Doganës së Kosovës.

Stavileci tutje u shpreh për Telegrafin se gjatë periudhës së aplikimit kanë pranuar mbi 1 mijë e 300 aplikime.

Lexo po ashtu Dogana e Kosovës kërkon mbi 100 doganierë, konkursi merr kritika pasi lejohen të aplikojnë vetëm qytetarët deri në 30 vjeç

“Gjatë periudhës së aplikimit, kemi pranuar një numër të madh aplikimesh. Numri i saktë i aplikantëve që kanë aplikuar për këtë konkurs ka qenë 1360. Ky interes i lartë tregon për nevojën dhe dëshirën e qytetarëve për të kontribuar në shërbimin doganor të Kosovës”, u shpreh Stavileci.

Ai më tej shtoi se procesi i përzgjedhjes është rigoroz dhe është duke u kryer nga një komision i posaçëm, duke marrë parasysh të gjitha kriteret dhe kërkesat e vendosura në konkurs.

“Në përfundim të këtij procesi, dogana do të bëj publik listën e kandidatëve që përmbushin të gjitha kërkesat dhe standardet e nevojshme për të qenë pjesë e e fazës së ardhshme. Procesi i përzgjedhjes së kandidatëve pritet të përfundojë javën e ardhshme”, tha Stavileci.

Ndryshe në shpalljen e konkursit tek përshkrimi i punës thuhet se “Oficerët doganor ushtrojnë kontrollin e mallrave, udhëtarëve, mjeteve, aeroplanëve, mbrojnë Kosovën nga kërcënimet e terrorizimit, kontrabandës, mashtrimit, krimit të organizuar dhe parandalojnë hyrjen e paligjshme të narkotikëve dhe mallrave të falsifikuara, duke zbatuar drejt udhëzimet ligjore dhe procedurat e parapara doganore, për të arritur misionin dhe objektivat e përcaktuara nga Dogana e Kosovës.

Dogana e Kosovës funksionon 24 orë në ditë, 365 ditë në vit. Oficerët doganor punojnë me orare të ndryshme, duke përfshirë ndërrimin e natës, fundjavën, festat zyrtare dhe punën jashtë orarit, nëse është e nevojshme, në çdo vend në gjithë Kosovën”. /Telegrafi/