Sot (e shtunë) është në program për t’u zhvilluar ndeshja e barazhit mes Vushtrrisë dhe Llapit, për një vend në Albi Mall Superligën e Kosovës për sezonin 2025/26.
Edicioni 2024/25 në futbollin e Kosovës pritet të mbyllet sot dhe të mësohet epilogu i çdo skuadre.
Ndeshja që mbyll siparin e sezonit është ajo e barazhit, ku Vushtrria dhe Llapi luajnë për një vend në Superligën e Kosovës.
Ky takim i shumëpritur është planifikuar të zhvillohet në stadiumin Fadil Vokrri në Prishtinë, me fillim nga ora 16:00.
Vushtrria vjen si fituese e ‘play-off’-it të Ligës së Parë, pasi si vend i dytë i Grupit B, mposhti 3-1 rivalët e Lirisë, të cilët përfunduan në pozitën e dytë në Grupin A.
Në anën tjetër, Llapi e ka mbyllur sezonin më të dobët që nga inkuadrimi në Superligë, duke përfunduar në pozitën e tetë në tabelë dhe duke u detyruar për këtë ndeshje barazhi për të mbetur në elitë. /Telegrafi/
