Dilema e ‘Sputnik V’, Raka: Nëse Rusia e para e ka pasur këtë vaksinë, pse nuk ka përshpejtuar që ta vaksinoj popullatën e vet

Mikrobiologu Lul Raka i ftuar në “Kallxo Pernime” ka folur në lidhje me vaksinën ruse “Sputnik V”.

Raka ka thënë se, dilema kryesore e kësaj vaksine është se Rusia ende nuk e ka përshpejtuar vaksinimin e popullatës së vet.

“Kryetarja e Komisionit Evropian, Ursula von der Leyen ka thënë se, është pritur që të ketë prodhim masiv, i është besuar kontratave të kompanive që t’i sjellin ato, prandaj siç ka thënë ajo, nuk është turp që të tregohet se këto vaksina kanë dështuar. Prej të dhënave që janë publikuar, vaksina ruse ‘Sputnik V’ ka pasur efikasitet, mirëpo duhet të dërgohet i gjithë aplikacioni që të përdoret në Evropë. Një ndër pyetjet që është parashtruar është se, nëse Rusia e para e ka pasur këtë vaksinë, atëherë pse nuk e ka përshpejtuar vaksinimin e popullatës së vet, kjo ka qenë një nga dilemat kryesore. Nëse në Kosovë i ofrohet vaksinat kineze e ato ruse, atëherë duhet kuptohet se në çfarë mjedisi po jetojmë”, tha Raka.

Në këtë intervistë, ai ka folur edhe për përvojën e tij njëvjeçare në luftën kundër pandemisë COVID-19.

Raka ka thënë se kur janë shfaqur rastet e para në Kinë, IKSKPK-ja dhe QKUK-ja kanë filluar përgatitjen e draft-planit të gatishmërisë për përballjen me virusin. /Telegrafi/