Dialogu në “vdekje klinike”, pak shpresa për rezultate

Njohësit e politikës vendore dhe asaj ndërkombëtare thonë se momentalisht nuk pritet të ketë asnjë zhvillim në lidhje me dialogun Kosovë- Serbi. Ata nuk presin ndonjë përparim derisa të përfundojnë ndryshimet brenda BE-së.

Kosova dhe Serbia, përveç pajtimit për tu takuar, nuk po kanë dakordim tjetër.

Madje edhe këtë e bëjnë me ndihmën e përfaqësuesve evropianë.

Takimi i fundit i kryenegociatorëve, sipas të dërguarit të Bashkimit Evropian për dialogun, Miroslav Lajçak, nuk solli rezultate konkrete në ndonjë çështje.

Shpresa në këtë drejtim nuk po kanë as njohësit e procesit të dialogut.

Lexo po ashtu Rakipi: Bisedimet Kosovë-Serbi të përqendrohen tek njohja

“Dialogu në mes Kosovës dhe Serbisë, ka hyrë në një vdekje klinike, siç po shihet nga takimi nga takim nuk prodhohet asgjë, dhe nuk ka vullnet nga asnjëra palë në zbatimin e marrëveshjeve,” ka thënë ish-diplomatja, Alma Lama.

Por, cili është shqetësimi kryesor i saj në këtë proces?

“Gjëja më negative që shoh është që vetëm Kosovës po i mbetet faji për këtë bllokadë, sikurse Kosova nuk po do zgjidhje, sikurse Asociacioni dhe Serbia po e përdorë shumë mirë në çështje të saj,” shtoi ish-ambasadorja e Kosovës në Itali, Lama.

Lexo po ashtu Denis MacShane: Nuk kemi gjetur në Kosovë një udhëheqës që do ta kuptojë që paqja është kompromis

Ngjashëm në qëndrime është edhe politologu Albinot Maloku, deri në përfundimin e ndryshimeve në institucionet e BE-së.

“Aktualisht jemi në një pushim të dialogut, sidomos deri të kemi emërimin e njerëzve të ri në Bashkimin Evropian, dhe pas kësaj të kemi një sqarim të vizonit të BE-së,” ka thënë Maloku.

Maloku shtoi se Serbia po pret edhe zhvillimet në arenën ndërkombëtare siç janë zgjedhjet në Amerikë, si dhe rezultatin e agresionit të Rusisë ndaj Ukrainës./TV Dukagjini