“Dëshmitare sekrete” në gjykimin e Sekiraqës, seanca mbyllet për publikun

Gjykimi ndaj Enver Sekiraqes për nxitje në vrasjen e policit Triumf Riza u mbyll përsëri për publikun.

Në këtë gjykim pritej të dëgjoheshin dy dëshmitare, emri i të cilave nuk u bë i njohur për të pranishmit në sallë.

Arsyet për mbylljen e seancës sipas gjyqtarit Shashivar Hoti ishin se gjykimi ishte i mbyllur edhe herën e parë kur këto dy dëshmitare kishin dhënë dëshminë.

“Gjykimi është i mbyllur për publikun pasi edhe në shqyrtimin gjyqësor ku janë marrë në pyetje këto dy dëshmitarë gjykimi ka qenë i mbyllur”, tha gjyqtari Shashivar Hoti.

Me mbylljen e seancës u pajtua edhe Prokurori Special Haki Gecaj.

“Unë pajtohem që seanca të jetë e mbyllur ngase edhe në gjykimin e kaluar është respektuar kjo kërkesë”, tha Gecaj.

Mirëpo edhe përkundër se seanca u mbyll për të gjithë të pranishmit, trupi gjykues bëri një përjashtim nga kjo rregull.

Trupi gjykues e lejoj praninë e monitoruesve të EULEX-it, në seancë me arsyetimin e misionit që e kanë ndërsa monitoruesit e BIRN i largoi nga salla.

Kjo nuk është hera e parë që kjo gjykatë në këtë mënyrë vendos standarde të dyfishta pasi edhe në gjykimin e kaluar ndaj Enver Sekiraqës e edhe në seancën dëgjimore për masën e paraburgimit ndaj të dyshuarve për vrasjen e Oliver Ivanoviqit gjykata kishte vepruar në të njëjtën mënyrë duke e lejuar praninë e monitoruesve ndërkombëtarë të EULEX-it, ndërsa duke e mbyllur seancën për monitoruesit vendorë të BIRN-it.

Enver Sekiraqa për akuzat e nxitjes së vrasjes së Triumf Rizes në vitin 2016 ishte dënuar me 27 vjet burg.

Rasti u kthye në rigjykim pasi Gjykata e Apelit e gjeti të mbështetur ankesën e mbrojtjes, Kosovare Kelmendi.

Enver Sekiraqa akuzohet për nxitje në vrasjen e ish-policit Triumf Riza dhe për detyrim.

Për vrasjen e policit Riza, Arben Berisha është dënuar me 35 vjet burg pasi është gjetur fajtor në akuzën se ka qenë ai që e ka vrarë Triumf Rizën në vitin 2007 në lagjen ‘Santea” më Prishtinë. /kallxo.com/