Deklaratat e Macron nga Beogradi për Kosovën shihen si shqetësuese

Deklaratat e presidentit të Francës, Emmanuel Macron nga Beogradi për Kosovën po vlerësohen si shqetësuese për vendin nga partitë opozitare dhe njohësit e integrimeve evropiane. Sipas tyre, kritikat e Macron janë të rënda, sidomos për kryeministrin Kurti, që siç vlerësojnë ata po merr vendime për qëllime elektorale në emër të Kosovës.

Nënkryetarja e Partisë Demokratike të Kosovës, Mimoza Ahmetaj, thotë për KosovaPress se shqetësimi i shprehur nga Macron se lëvizjet e fundit të Kosovës sa i përket hapjes së urës së Ibrit nuk dërgojnë sinjal të mirë duhet të merren seriozisht nga kryeministri Kurti.

“Vetë vizita e zotëri Macron në Beograd dhe nënshkrimi i 11 marrëveshjeve dhe investimi në 2.7 miliardë eurove në aeroplanët luftarakë në kohën kur Kosova është e izoluar është mesazh në veti. Ai po e viziton Serbinë për dy herë radhazi gjatë mandatit të tij dhe ky është mesazhi sesa kanë avancuar raportet mes Serbisë dhe Francës. Ndërkohë, Kosova vazhdon të jetë e izoluar në tërësi. Sigurisht edhe mesazhet në lidhje me marrëveshjeve dhe kritikave të drejtuara janë ndaj zotëri Kurtit dhe qasjes së tij ndaj Bashkimit Evropian dhe arritjes së marrëveshjes finale me Serbinë”, thotë ajo.

Deputetja e LDK-së, Rrezarta Krasniqi, thotë se për shkak të kryeministrit Kurti, vendi po vazhdon të jetë i izoluar, derisa Serbia po thellon marrëdhëniet me Perëndimin.

“Natyrisht se më mirë do të ishte që presidenti Macron të vizitonte Kosovën sesa Serbinë. Serbia si një shtet larg demokracisë dhe pritshmërisë së Francës, mirëpo takimi i djeshëm dha një mesazh të qartë se edhe Serbia duhet t’i respektojë marrëveshjet e arritura me Kosovën. S’duhet të ketë asnjë hap para pa u respektuar ato marrëveshje. Ndërsa sa i përket deklaratës së presidentit Macron nga Beogradi për veprimet e Kosovës, të cilat e i quajti si lëvizje të njëanshme duhet të jenë shqetësuese për Kosovën, sidomos për kryeministrin Kurti i cili po merr veprime politike në emër të Kosovës”, thekson Krasniqi.

Profesori i marrëdhënieve ndërkombëtare, Dritëro Arifi, thotë se presidenti francez nuk po i beson më Qeverisë Kurti, andaj akuzat e tij ndaj vendit janë të rënda.

“Duhet kuptuar me shumë seriozitet dhe deshifruar dhe zbërthyer se çka duhet të bëjmë, e cila është esenca që ka porositur presidenti francez, Macron. Mos të harrojmë që qeveria e Kosovës është zotuar për të zbatuar një marrëveshje që është dakorudar paraprakisht me BE-në. Tash duhet zbatuar për atë çka je marrë vesh dhe të mbash fjalën, duke ditur se Macron edhe në Tiranë e ka thënë se Qeveria e Kosovës nuk po e mban fjalën. Këto janë akuza të rënda, pa nevojshme dhe kanë mundur të zgjedhën në kanale diplomatike pa bërë zhurmë”, tha Arifi.

Në lidhje me vizitën dyditore të presidentit të Francës në Serbi dhe mesazhet e tij për Kosovën, foli edhe kryeministri Kurti, i cili tha se me shtetin francez duan bashkëpunim të ngushtë, pasi e konsiderojnë aleat dhe partner shumë të rëndësishëm

Macron dje në Beograd përmendi dialogun Kosovë-Serbi, ku theksoi nevojën e zbatimit të marrëveshjes së Brukselit dhe Ohrit, si the themelimin e asociacionit./KP/