Daut Haradinaj: Teuta Rugova bëri atë që bëri babai i saj para 13 vitesh

Deputeti i AAK-së, Daut Haradinaj, thotë se është befasuar nga “qëllimet e disa mediave që ta komprometojnë  të vërtetën e mbështetjes që familja Rugova i ka dhënë Ramush Haradinajt për kryeministër”.

Haradinaj, përmes një postimi në Facebook, ka shprehur “respekt të pa fund për guximin e Teutës që e bëri të njejten veprim siç bëri babai i saj para 13 vitesh”.

Postimi i plotë i Daut Haradinajt:

“Jam i befasuar me qëllimet e disa mediave që ta komprometojnë një të vërtetë të mbështetjes që familja Rugova i ka dhënë Ramushit për kryeministër, duke implikuar lloj lloj emrash në teoritë e tyre konspirative.

Unë mund t’iu them se unë e filanat e fistekët që janë zënë në gojë, këtë gjë e kemi marrë vesh nga mediat. Kaq kemi qenë të përzier në këtë proces. Po “rrena e marrja, hala nuk e kanë çelë varrë kërkend në këtë vend”!

Veç vazhdoni se një ditë do të turpëroheni nga fjalët e rrenat tuaja, sepse unë kam punë me të mençur, se sa të merrem me denoncimin e shpifjeve të flliqta që bëni!

Respekt të pa fund për guximin e Teutës që e bëri të njejten veprim siç bëri babai i saj para 13 vitesh”, ka shkruar Haradinaj. /Telegrafi/