Daja për ndeshjen e madhe ndaj Shkupit: Jemi pothuajse të barabarta, jemi komplet – Frashëri mbron portën

Trajneri i Ballkanit, Ilir Daja ka thënë se ndeshja e kthimit kundër Shkupit, do të jetë më e vështirë se e para që u fitua 2-1.

Timonieri shqiptar ka thënë se ekipi i tij duhet të angazhohet maksimalisht edhe për 90-të minuta, në mënyrë që ta vazhdojë ëndrrën, kualifikimin në fazën e grupeve të Ligës së Konferencës.

Ballkani luan ndaj Shkupit të enjten në stadiumin “Fadil Vokrri” në Prishtinës prej orës 20:00.

“Mendojmë që nesër do të kemi ndeshje të vështirë. E vështirë për lojtarët sepse stafi nuk ka shumë vështirësi, vetëm duhet të ulë dozën e emocioneve, ta menaxhoj stresin që lojtarët të japin më të mirën e mundshme”, ka thënë ai.

I pyetur për ekipin favorit, Daja u shpreh se skuadrat janë pothuajse të barabarta.

“Nuk ka favorit direkt, dy skuadra pothuajse të barabarta. Kemi avantazh sepse fituam ndeshjen e parë, shpresojmë të na mbështesin tifozët. Duhet të djersitemi nëse mendojmë t’i shtyjmë ëndrrat përpara”.

“Nuk e kemi parashikuar që në start të arrijmë këtu. Gjithë kontingjenti është në dispozicion. Një lojtar të shohim si e ka gjendjen, ka qenë i diferencuar. Nuk dua ta publikoj dhe nuk dua të jap elemente shtesë. Është një nga mbrojtësit tanë në dyshim”, ka thënë Daja.

Në ndeshjen e kthimit, Daja ka bërë të ditur se në portë do të startojë Stivi Frashëri, pasi Damir Lulanoviq është i lënduar. /Telegrafi/