Ministri i Jashtëm i Serbisë, Ivica Daçiq ka thënë sot se Kosova nuk mund të pranohet në Këshillin e Evropës, pasi sipas tij, nuk është shtet dhe nuk njihet nga disa vende të Bashkimit Evropian.

Ky deklarim i Daçiq erdhi pasi zv/kryeministri kosovar Enver Hoxhaj bëri të ditur sot, se gjatë këtij muaji, ose më së largu në janarin e vitit të ardhshëm Kosova do të aplikojë për tu anëtarësuar në Këshillin e Evropës.

“Kosova nuk i plotëson parimet dhe standardet themelore në lidhje me mbrojtjen e të drejtave të njeriut, demokracisë dhe sundimit të ligjit, për të cilat nuk ka bazë që të kërkojë të pranohet në Këshillin e Evropës”, tha Daçiq për Tanjug, përcjell Insajderi.

Daçiq u shpreh se kërkesa e Kosovës për anëtarësim është në kundërshtim me parimin e nenit 1 të Statutit të Këshillit të Evropës, sepse sipas kryediplomatit serb, Kosova dëmton unitetin e organizatës.

“Kjo do të rrezikonte edhe dialogun ndërmjet Beogradit dhe Prishtinës, i cili është thelbësor për stabilitetin rajonal”, ka deklaruar Daçiq.

KosovëLajme