Daci: Çdo gjë që del jashtë teorisë së judeo-kristianizmit, vështirë pranohet nga BE-ja (Video)

Kryetari i Akademisë së Shkencave Arteve të Kosovës, Nexhat Daci ka thënë se taksa ndaj produkteve serbe nga Qeveria e Kosovës është një punë e mbarë.

“Bashkimi Evropian kurrë nuk ka qenë i ndjeshëm ndaj kërkesave tona. Ndërsa gjithmonë kur Serbia ka shtyrë diçka në agjendë ka gjetur mbështetje në Evropë. Por, edhe liderët tanë kanë një pjesë të madhe të përgjegjësisë, për shkak se kanë menduar se duhet të sillemi ashtu në Evropë”, tha Daci.

Ish-kryetari i Kuvendit të Kosovës, në një intervistë në “Dossier D” në RTV Dukagjini, ka thënë se Evropa është ndërtuar në bazë të teorisë së judeo-kristianizmit, dhe çdo gjë që del nga ky kontekst është vështirë të pranohet.

“Evropa është ndërtuar, jeton dhe vepron në bazë të teorisë së judeo-kristianizmit dhe çdo element që nuk është në këtë fundament, shumë vështirë përpihet në strukturat e BE-së”, tha ai, përcjell Telegrafi.

Daci thotë se reagimi i Brukselit kundër Kosovës për taksën e vendosur ndaj Serbisë, nuk është gjë tjetër, pos reagim politik.

Akademiku ka thënë se ngritja e çmimeve një ditë pas vendosjes së taksës ndaj produkteve serbe është veprim shumë i ulët nga bizneset.

Ish zyrtari i lartë i LDK-së ka thënë se Serbia duhet të harrojë se Kryeministri i Kosovës është i së kaluarës, por i sodit dhe së nesërmes.

“Taksa duhet të mbetet aq kohë sa e vlerëson kryeministri Haradinaj”, ka deklaruar ndër të tjera Nexhat Daci./Telegrafi/