Presidenti i Serbisë, Aleksandar Vuçiq, njoftoi të dielën masa të ashpra kundër protestuesve antiqeveritarë pas ditëve të trazirave në rrugë në të gjithë Serbinë që kanë sfiduar sundimin e tij gjithnjë e më autokratik në vendin ballkanik, shkruan CNN.
Mijëra njerëz sfiduan kërcënimin e Vuçiqit për një goditje dhe protestuan më vonë të dielën në qytete të ndryshme serbe, përfshirë kryeqytetin Beograd.
Duke thirrur "arrestoni Vuçiqin", protestuesit kërkuan që të gjithë të ndaluarit në ditët e kaluara të lirohen. Nuk u raportuan incidente, transmeton Telegrafi.
Në një nga fjalimet e tij të shpeshta televizive drejtuar publikut, Vuçiq akuzoi demonstruesit antiqeveritarë për "terrorizëm të pastër" dhe përsëriti pretendimet e tij se muaj të tërë protestash të vazhdueshme kundër sundimit të tij, janë orkestruar në Perëndim dhe synojnë shkatërrimin e Serbisë.
"Vendi ynë është në rrezik të madh, ata kanë rrezikuar të gjitha vlerat tona, jetën normale, çdo individ", tha Vuçiq, duke pretenduar një skemë të përpunuar që përfundimisht do të instalonte autoritete "anarko-majtiste" në të ardhmen. Ai nuk ofroi asnjë provë konkrete për pretendimet e tij.
"Nëse nuk ndërmarrim hapa më të ashpër, është çështje ditësh kur ata (protestuesit) do të vrasin dikë. Po e them këtë për histori", tha Vuçiq.
Paralajmërimet e ashpra erdhën pas pesë netësh radhazi përleshjesh midis protestuesve nga njëra anë dhe policisë dhe besnikëve të Vuçiqit nga ana tjetër.
Protestuesit e zemëruar të shtunën në mbrëmje dogjën zyrat e Partisë Progresive Serbe të Vuçiqit në një qytet në Serbinë perëndimore, dhe të aleatëve të tjerë të koalicionit qeverisës.
Demonstruesit të shtunën në mbrëmje u përleshën gjithashtu me policinë në Beograd, dhe në qytetin verior të Novi Sadit. Policia përdori gaz lotsjellës kundër demonstruesve që hodhën granata tymuese, flakë dhe shishe drejt tyre.
Vuçiq nuk specifikoi se cili do të jetë reagimi i shtetit që ai tha se do të vijë brenda një jave. Por ai theksoi se një gjendje e jashtëzakonshme nuk është e afërt. Dhjetëra njerëz tashmë janë ndaluar dhe plagosur në ditët e fundit, ndërsa policia është përballur me akuza për forcë të tepërt dhe ndalime arbitrare të protestuesve.
"Do të dëshmoni vendosmërinë e shtetit të Serbisë. Ne do të përdorim gjithçka që kemi në dispozicion për të rivendosur paqen dhe rendin në vend", tha Vuçiq.
Përplasjet e kësaj jave shënuan një përshkallëzim të madh pas më shumë se nëntë muajsh demonstratash kryesisht paqësore, që filluan pasi një çati betoni u shemb në një stacion treni në veri të Serbisë, duke mbytur 16 persona.
Shumë njerëz në Serbi ia hodhën fajin për tragjedinë korrupsionit të përhapur gjerësisht në projektet shtetërore të infrastrukturës, të cilat ata thonë se nxitën punën e dobët të rinovimit.
Presidenti serb është përballur me akuza për shtypjen e lirive demokratike, ndërsa lejon që krimi i organizuar dhe korrupsioni të lulëzojnë. Ai e ka mohuar këtë.
Serbia po kërkon zyrtarisht anëtarësimin në BE, por Vuçiq ka mbajtur lidhje të forta me Rusinë dhe Kinën. Të dielën, ai vlerësoi mbështetjen e Rusisë për qeverinë e tij kundër asaj që e quajti një "revolucion me ngjyra" kundër qeverisë së tij. /Telegrafi/
