“Çka është ky nënshtrim i mjerë ndaj Serbisë?”

Analisti Lumir Abdixhiku ka reaguar ndaj letrës së përbashkët të Odës Ekonomike të Kosovës dhe të Odës Ekonomike të Serbisë të cilat janë ankuar në BE për rrokullisjen e kamionëve të Serbisë në Kosovë.

Ai ka thënë se OEK nuk ka reaguar kurrë për shkeljet që Serbia i ka bërë dhe vazhdon t’i bëjë ndaj Kosovës.

“Shumë mirë që Oda Ekonomike e Kosovës dhe ajo e Serbisë, i paskan shkruar Brukselit ankesë të përbashkët për rrokullisjen e kamionëve. Qenkan brengosur për partneritetin e ndërsjellë – siç e do rendi i partnerëve.

Por, meqë u paska mbet te partneriteti e te rendi, si s’u kujtuan këto kurrë, veçanërisht kjo e jona, t’i shkruaj ndonjëherë Brukselit që Serbia nuk i njeh Kosovës as targat e automjeteve e as pasaportat, dy parakushte thelbësore për tregti e lëvizje?

Siç s’i shkruan asnjëherë se përkundër nënshkrimit të marrëveshjes për tregti të lirë, obligim evropian, Serbia ndalon, kthen e refuzon secilën dërgesë kosovare për atje; ani pse i shet këndej tre-katërqind milionë euro në vjet? Çka është ky nënshtrim i mjerë kështu?”, ka shkruar Abdixhiku në profilin e tij në Facebook.