Çfarë është “Mercedes-Benz Road Safety Dashboard”?

Të dhënat e automjeteve mund të shpëtojnë jetë – Mercedes-Benz tani po bën hapin tjetër vendimtar: Londra është një nga qytetet e para evropiane që hulumton se si të dhënat nga automjetet, duke filluar me të dhënat nga sistemet e asistencës së shoferit të Mercedes-Benz, i bëjnë rrugët e qytetit më të sigurta për të gjithë.

“Mercedes-Benz Road Safety Dashboard” u zhvillua së bashku me Transportin për Londrën dhe një ekip nga divizioni Urban Mobility Solutions (UMS) i Mercedes-Benz AG. Ky mjet diGJital mund të nxjerrë në pah pikat e mundshme të rrezikut brenda qytetit përpara se të ndodhë një aksident.

Aktualisht, qytetet dhe agjencitë qeveritare përdorin informacione rreth përplasjeve dhe incidenteve që kanë ndodhur në rrugët e tyre për të kuptuar sigurinë rrugore dhe për të identifikuar rreziqet. Megjithatë, kjo gjithmonë do të thotë se në atë vend veçse ka pasur incidente të rënda, shkruan “hanser-automotive“, përcjell Telegrafi.

Daniel Deparis, Shef i Zgjidhjeve për Mobilitetin Urban në Mercedes-Benz AG dhe Rikesh Shah, Shef i Inovacionit Tregtar në Transport për Londrën, kanë bashkuar forcat për të punuar së bashku për të shfrytëzuar këtë zgjidhje inovative.

Bisedimet e para me përfaqësues nga Londra u zhvilluan në vitin 2019. Që atëherë, inxhinierë, ekspertë sigurie, specialistë të mbrojtjes së të dhënave dhe analistë të të dhënave nga Londra dhe nga Mercedes-Benz kanë punuar së bashku intensivisht dhe me shumë sukses.

Siguria rrugore në mjedisin urban

“Së bashku me Transportin për Londrën dhe ekspertët tanë, ne filluam këtë program novator për më shumë siguri në trafik dhe tani kemi qenë në gjendje të përfundojmë fazën e zhvillimit,” thotë Daniel Deparis, Shefi i Zgjidhjeve të Lëvizshmërisë Urbane në Mercedes-Benz.

“Ne jemi të përkushtuar ndaj strategjisë tonë Vision Zero, strategji kjo e cila synon që deri në vitin 2041 t’i largojë nga rrugët e Londrës të gjitha aksidentet serioze dhe fatale. Bashkëpunimi me Mercedes-Benz po na ndihmon të zhvillojmë teknologji të reja të drejtuara nga të dhënat që do të na afrojnë më shumë me këtë qëllim”, thotë Rikesh Shah, Shef i Inovacionit Tregtar në Transport për Londër.

Informacioni nga sistemet e ndihmës së shoferit

“Mercedes-Benz Road Safety Dashboard” bazohet në mesazhe individuale nga sistemet e asistencës së shoferit që janë tashmë në dispozicion në pothuajse të gjitha seritë e modeleve Mercedes-Benz. Sistemet mund të ndërhyjnë në shumë situata të rrezikshme në rrugë dhe gjithashtu të zvogëlojnë ashpërsinë e përplasjeve të mundshme ose madje t’i shmangin ato krejtësisht.

Bazuar në raportet individuale në të njëjtin pozicion GPS, pikat e zeza të aksidenteve të mundshme identifikohen dhe analizohen automatikisht duke përdorur një algoritëm inteligjent të zhvilluar nga inxhinierët e Mercedes-Benz.

Të dhëna shtesë nga infrastruktura e transportit

Të dhënat anonime të automjeteve nga sistemet e asistencës janë pasuruar me të dhëna shtesë nga Qyteti i Londrës. Kjo përfshin infrastrukturën ekzistuese të trafikut si semaforët ose vendkalimet zebra, informacionin mbi aksidentet që kanë ndodhur tashmë dhe dendësinë e automjeteve, çiklistët dhe këmbësorët. Kjo e bën të dukshme në panelin e kontrollit ku duhet të ndërmerren veprime.

Fokusi është kryesisht te përdoruesit më të rrezikuar të rrugës: këmbësorët dhe çiklistët. Situatat e rrezikshme në zonat përreth shkollave, kopshteve dhe universiteteve janë monitoruar veçanërisht nga afër në Londër.

Funksionaliteti i “Mercedes-Benz Road Safety Dashboard”

Falë sensorave si ultrazëri, radarët, dhe stereo kamerat, objektet të cilat mund të detektohen në ambientin rrethues të veturës janë: veturat që lëvizin përpara, kalojnë, afrohen nga pas apo edhe veturat që vijnë përballë e të cilat janë në rrezen e zbulimit – por edhe këmbësorët, shenjat rrugore dhe llojet e ndryshme të shenjave të komunikacionit.

Nëse ka një paralajmërim akustik dhe vizual ose frenim autonom emergjent, ky informacion dërgohet në sistemin “cloud” të Mercedes-Benz dhe mbetet anonim. /Telegrafi/