Çështja Urës së Ibrit, Ferati: Është i obligueshëm dhe i pashmangshëm koordinimi me bashkësinë ndërkombëtare

Ish-ministri i Pushtetit Lokal, Sadri Ferati, ka thënë se është e drejtë e Qeverisë së Kosovës të krijojë kushte për qarkullimin e lirë, duke përfshirë edhe hapjen e Urës së Ibrit. Mmirëpo, sipas tij, duke e ditur se veriu është gjithmonë rrezik për tensionime është i obligueshëm dhe i pashmangshëm koordinimi me bashkësinë ndërkombëtare, në rend të parë me KFOR-in dhe EULEX-in.

Sa i përket protestës së qytetarëve të komunitetit serb që u zhvillua më 07.08.2024, në veri të Mitrovicës, kundër hapjes së paralajmëruar të Urës, Ferati ka thënë se protestat e serbëve rrallëherë kanë pasur diçka në përmbajtje, në esencë, dhe se ata sa herë u është thënë nga Aleksandar Vuçiqi ose Lista Serbe kanë dalë (në protesta).

“Sepse Ura realisht nuk i rrezikon… Sepse janë edhe dy ura të tjera, edhe në lindje, edhe në perëndim, përmes të cilave futen automjetet në atë pjesë të qytetit. Pra, ata më tepër e politizojnë. Pra, është protestë e paarsyeshme, por përkundër kësaj, duke e ditur se ata serbë që nxiten dhe krijojnë shqetësime të tjera, mund të jetë e mjaftueshme për bashkësinë ndërkombëtare që të mos pajtohen me këtë çështje dhe pastaj të prishen raportet me bashkësinë ndërkombëtare”, tha Ferati për KALLXO.com.

Ish-ministri ka kritikuar mungesën e bashkëpunimit të plotë të Qeverisë së Kosovës me bashkësinë ndërkombëtare, duke theksuar se sa herë nuk ka pasur koordinim me bashkësinë ndërkombëtare janë krijuar tensione dhe kjo është larg interesit të Kosovës që të ketë një normalizim të situatës dhe që veriu i Kosovës të konsiderohet dhe të jetë një ambient i qetë ku funksionon ligji, shteti.

“Përvoja jonë me tabela, pastaj largimi i serbëve prej institucioneve është një përvojë që tregon se aty nuk është bërë mjaftueshëm koordinimi me bashkësinë ndërkombëtare, prandaj e shihni edhe cilat janë rezultatet, me të cilat ne nuk jemi të kënaqur. Për mos me ndodhë diçka e tillë, unë mendoj që koordinimi është i obligueshëm” – shtoi Sadri Ferati.

Ish-ministri ka komentuar edhe rreth takimit të paralajmëruar të mbahet më 08.08.2024 në Komunën e Mitrovicës së Veriut, ku qytetarët e komunitetit serb dhe të komuniteteve të tjera mund të shfaqin brengat e tyre.

Ferati tha se mendon që ky takim do të bojkotohet nga shumica e qytetarëve të komunitetit serb.