Bytyqi-Aksinte: Rumania mbështet plotësisht Maqedoninë e Veriut në procesin e eurointegrimit

Zv. kryeministri për Çështje Ekonomike, Fatmir Bytyqi realizoi takim me ambasadoren e sapoemëruar të Republikës së Rumanisë Adela Monika Aksinte, me të cilën u bisedua për procesin e eurointegrimit të Republikës së Maqedonisë së Veriut dhe bashkëpunimin potencial ekonomik midis dy vendeve.

Zv. kryeministri Bytyqi, thuhet në deklaratë, uroi Aksinten për pozicionin e saj të ri, duke i dëshiruar sukses dhe shprehi shpresë për thellimin e bashkëpunimit ekonomik midis dy vendeve, por edhe mbështetje nga Rumania, si një nga anëtarët më të rinj të BE, për të shkëmbyer përvoja sidomos në integrimin ekonomik me BE-në.

“Ambasadorja Aksinte përkujtoi se këtë vit shënohet 20 vjetori i vendosjes së marrëdhënieve bilaterale midis Maqedonisë së Veriut dhe Rumanisë, kurse theksoi se kulmi i prioriteteve gjatë mandatit të saj do të jetë pikërisht thellimi i marrëdhënieve ekonomike”, thuhet në deklaratë.

Ajo shtoi se Maqedonia e Veriut mund të presë mbështetje të plotë në procesin e eurointegrimit nga Rumania, në çdo aspekt të mundshëm.

Zv. kryeministri theksoi se ka potencial të madh për rritjen e bashkëpunimit, duke potencuar disa sektorë, siç janë investimet e mundshme në prodhimtari nga ndërmarrjet rumune në vend, por edhe pjesëmarrjen e mundshme të kompanive nga ky vend në realizimin e projekteve të infrastrukturës, energjetikës, bujqësisë.

“Qeveria e Republikës së Maqedonisë së Veriut krijon parashikueshmëri të plotë, tha zëvendëskryeministri dhe shtoi krijohen politika ekonomike cilësore për mbështetje direkte të investitorëve, sidomos kompanitë me teknologji të lartë dhe të orientuara nga eksporti, por edhe për të avancuar politikat doganore dhe tatimore, me çka plotësisht ndikohet në klimën më pozitive afariste në vend”, shtojnë nga atje./Telegrafi/