Blinken thotë se bisedimet “ndoshta shansi i fundit” për armëpushim në Gaza

Sekretari amerikan i Shtetit, Antony Blinken, i cili ka udhëtuar në Izrael për të nxitur një armëpushim në Gaza, tha të hënën se negociatat në vazhdim ishin “ndoshta shansi i fundit” për të arritur një marrëveshje për t’i dhënë fund luftës.

“Ky është një moment vendimtar – ndoshta mundësia më e mirë, ndoshta e fundit, për të kthyer pengjet në shtëpi, për të arritur një armëpushim dhe për t’i vënë të gjithë në një rrugë më të mirë drejt paqes dhe sigurisë së qëndrueshme”, ka thënë Blinken teksa takoi presidentin izraelit Isaac Herzog, shkruajnë mediat e huaja, përcjell Telegrafi.

“Është koha që ajo (marrëveshja) të arrihet. Është gjithashtu koha për t’u siguruar që askush të mos ndërmarrë ndonjë hap që mund ta prishë këtë proces”, ka shtuar Blinken.

“Ne po punojmë për të siguruar që të mos ketë përshkallëzim, të mos ketë provokime, që të mos ketë veprime që në çfarëdo mënyre mund të na largojnë nga arritja e kësaj marrëveshjeje ose, për këtë çështje, përshkallëzimi i konfliktit në vende të tjera dhe me intensitet më të madh”.

Blinken, në vizitën e tij të nëntë në Lindjen e Mesme që nga sulmi i Hamasit në Izrael më 7 tetor, është planifikuar të takohet më vonë të hënën me kryeministrin Benjamin Netanyahu.

Sekretari i Shtetit tha se ishte një “moment i vështirë” në Izrael dhe paralajmëroi kundër çdo lëvizje që mund të rrisë tensionet rajonale, pas kërcënimeve nga Irani dhe grupi i armatosur libanez Hezbollah për t’u hakmarrë për vrasjet e fundit të dy liderëve militantë.

Herzog, i cili ka një rol kryesisht ceremonial, tha se izraelitët dëshironin të shihnin “sa më shpejt të jetë e mundur” kthimin e pengjeve ende të mbajtura në Gaza që nga sulmi i 7 tetorit që shkaktoi luftën.

“Nuk ka objektiv më të madh humanitar dhe nuk ka kauzë më të madhe humanitare sesa kthimi i pengjeve tanë”, ka thënë më tej Herzog. /Telegrafi/