Besa Mahmuti shqiptarja e vetme që punon në Sindikatën e Transportit Publik në Zvicër: Duhet të tregojmë se sa punëtorë e të ndershëm jemi

Shqiptarët në mërgim kanë arritur të integrohen me sukses në shtete të ndryshme evropiane, duke dhënë një kontribut të rëndësishëm dhe duke u punësuar në pozita mjaft të rëndësishme. Një ndër shqiptarët që po shënon sukses në Evropë është edhe Besa Mahmuti, e cila është shqiptarja e vetme që punon në Sindikatën e Transportit Publik në Zvicër.

Rrugëtimi i Besa Mahmutit për të arritur këtë pozicion pa dyshim që nuk ka qenë i lehtë. Për Telegrafin, ajo ka ndarë disa nga sfidat kryesore që ka hasur.

“Që në moshë të re, kur isha vetëm 18 vjeç, fillova të angazhohem në lëvizjet sindikale me një pasion të thellë për të drejtat e punëtorëve dhe për drejtësinë në vendin e punës. Ky përkushtim dhe përvoja shumëvjeçare më ndihmuan të punësohem në Sindikatën e Transportit Publik në Zvicër. Një nga sfidat kryesore ka qenë padyshim balancimi i kulturës time shqiptare me ambientin zviceran, por gjithashtu tejkalimi i paragjykimeve që ndonjëherë hasen ndaj emigrantëve. Megjithatë, përkushtimi im për të ndihmuar punëtorët dhe për të mbrojtur të drejtat e tyre ka qenë shtytësi im kryesor”, ka pohuar ajo.

Gjithashtu, ajo ka treguar për disa nga përgjegjësitë e saj në këtë sindikatë, duke theksuar se synimi i saj është që zëri i punëtorëve të dëgjohet dhe të marrin mbështetjen e nevojshme.

“Në rolin tim si sekretare sindikale, unë jam përgjegjëse për organizimin dhe mbështetjen e punëtorëve të sektorit të transportit publik. Kjo përfshin negociatat kolektive, mbrojtjen e të drejtave të punëtorëve dhe ofrimin e këshillave juridike për anëtarët e sindikatës. Gjithashtu, organizoj dhe koordinoj fushata të ndryshme për të rritur ndërgjegjësimin mbi çështjet e rëndësishme që prekin punëtorët, si dhe përmirësimin e kushteve të tyre të punës. Gjithmonë synoj që zëri i punëtorëve të dëgjohet dhe të marrin mbështetjen e nevojshme”, ka theksuar ajo.

Besa Mahmuti ka folur gjithashtu për paragjykimet që ka hasur.

“Nuk do të gënjej, rruga nuk ka qenë e lehtë. Si shqiptare në Zvicër, kam hasur sfida të shumta, duke përfshirë paragjykimet dhe stereotipet që shpesh krijojnë barriera të padukshme në vendin e punës. Megjithatë, me shumë punë, përkushtim dhe profesionalizëm, kam arritur të dëshmoj se një person nuk duhet të gjykohet nga prejardhja e tij, por nga puna dhe angazhimi që tregon. Këto përvoja më kanë bërë më të fortë dhe më kanë dhënë një vullnet të palëkundur për të vazhduar luftën për drejtësi dhe barazi në vendin e punës”, theksoi ajo.

Në përfundim, Besa Mahmuti porositi të gjithë shqiptarët që jetojnë në Evropë të mos dorëzohen kurrë.

“Mesazhi im për të gjithë shqiptarët që jetojnë dhe punojnë në Evropë është të mos dorëzohen kurrë. Integrimi në tregun e punës mund të jetë sfidues, por me përkushtim, arsim dhe besim në vetvete, çdo sfidë mund të tejkalohet. Ne duhet të jemi krenarë për identitetin tonë dhe të tregojmë se shqiptarët janë punëtorë të zellshëm dhe të ndershëm. Përfshirja në sindikata dhe organizata të ndryshme profesionale mund të jetë një rrugë e shkëlqyer për të mbrojtur të drejtat tona dhe për të kontribuar në shoqëritë ku jetojmë. Mos harroni, suksesi nuk është vetëm për ju, por edhe për të ardhmen e gjeneratave tona”, potencoi ajo.

Ndryshe, në Evropë jetojnë dhe punojnë shumë shqiptarë, të cilët kontribuojnë në fusha të ndryshme dhe shënojnë sukses në karrierat e tyre./Telegrafi/