Berisha për protestën: Refuzimi i policisë është nul, Rama kërkon sherr

Ndonëse, Policia e Shtetit nuk dha leje për protestën e njoftuar më 6 dhjetor nga Sali Berisha, ky i fundit e konsideron vendim nul, ndërsa thekson se asgjë nuk e ndal popullin opozitar të vërshojë në Bulevard më 6 dhjetor, ora 12:00.

Sipas Berishës, policia nuk njeh ligjet dhe Kushtetutën e këtij vendi.

“Policia e Shtetit njoftoi mbrëmë se nuk njeh Kushtetutën dhe ligjet e vendit. Lidhur me këtë njoftim, i rikujtoj këtyre vasalëve të Edi Ramës, se Kushtetuta nuk njeh kufizime për protestat dhe liritë e qytetarëve. Por krahas kësaj, ka një vendim të Gjykatës Kushtetuese, që vendos se protestuesi nuk ka asnjë detyrim që të njoftojë policinë.

Së treti, policia e shtetit e Edi Rramës, po e trajton samitin e liderëve të BE, sikur këtu po mblidhen diktatorët e botës, në një kohë kur ata që vijnë në Tiranë janë shtetarë të zgjedhur me votën e lirë.

Komisioni Evropian, për të qartësuar pozicionin evropian, kërkoi që e drejta për protestë të respektohet. Prandaj ai refuzim është i paqenë, është nul. Ai tregon fytyrën e vërtetë të këtij regjimi që është i tmerruar nga populli opozitar që do të mbushë sheshin më datën 6 në orën 12:00.

Do jetë një protestë që nuk është parë ndonjëherë. Do jetë një protestë ku do buçasë në çdo anë thirrja, ‘E duam Shqipërinë si gjithë Evropa. Thirrja: Edi Rama dhe narkoshteti nuk përfaqësojnë Shqipërinë’.

Kemi kaq motive për të qenë në shesh duke garantuar sigurinë e plotë të miqve tanë, të cilët i përshëndesim dhe e konsiderojmë nderim të madh për kombin shqiptar.

Rama mendon se është ligji e Kushtetuta, kërkon sherr, po i them hiq dorë, se forcë në botë që të pengojë popullin të mbushë Bulevardin nuk do ketë e të gjitha përgjegjësitë do të bien mbi ty”, tha Berisha. /Tch/Telegrafi/