Berisha largohet nga futbolli australian, transferohet në Japoni

Besart Berisha është larguar nga skuadra e deritashme Melbourne Victory.

Sulmuesi nga Kosova këtë gjë e ka konfirmuar për faqen zyrtare të klubit australian.

Sipas asaj që ka shkruar faqja zyrtare e klubit, Berisha është larguar për të luajtur jashtë Australisë.

“Unë kam emocione shumë të përziera pasi kam pasur një kohë të mahnitshme në Melbourne dhe Australi”, tha Berisha.

“Ky largim është pak i trishtuar por në fund mendoj se është një vendim i duhur për të ardhmen time”.

“Dua t’i falënderoj të gjithë për përkrahjen, jo vetëm në kohë të mira, por edhe në momente të vështira. Ju jam mirënjohës gjithmonë”, u shpreh Berisha për faqen zyrtare të klubit.

Berisha iu bashkua Melbournes në vitin 2014 nga skuadra tjetër australiane Brisbane Roar.

Në Brisbane, Berisha kishte qëndruar nga viti 2011 kur u largua nga futbolli evropian.

32-vjeçari është golashënuesi më i mirë në histori të kampionatit australian me 124 gola në 206 ndeshje të zhvilluara.

Berisha karrierën do ta vazhdoj në futbollin japonez tek skuadra Shanfrencce Hiroshima.

Kjo skuadër aktualisht mban kryesimin në futbollin japonez me 37 pikë të grumbulluara, nëntë më shumë se përcjellësi FC Tokyo.

Gjatë qëndrimit në futbollin australian, Berisha ka fituar katër herë titullin e kampionit. /Telegrafi/