Bekë Berisha, Qeverisë: Për tri vite na keni përmendur shpenzimet e rezervave shtetërore – na tregoni çfarë hapa morët ju

Partitë opozitare në Kuvendin e Kosovës kanë thirrur seancën e jashtëzakonshme parlamentare për rritjen e çmimeve.

Në fjalën e tij deputeti i AAK-së, Bekë Berisha thotë se jemi dëshmitarë për rritjen e madhe të çmimeve për shumë produkte elementare në Kosovë.

Ai thotë se vendet e ndryshme në botë kanë marrë masa me kohë pasi një krizë në Ukrainë ishte e paralajmëruar më parë, derisa sipas tij Qeveria e Kosovës asnjë hap nuk ndërmori.

“Kur ne ishim në Qeveri, për tri vite me radhë na keni përmendur shpenzimet e rezervave shtetërore. A mundeni tash të na tregoni çfarë keni bërë ju me rezervat shtetërore. A mund të na tregoni sa tonë grurë keni blerë e magazinuar. Çfarë hapash keni marrë për të bërë kontrata afatgjate për furnizim me derivate apo çfarë masash keni marrë për të siguruar armë e municion në rast të ndonjë konflikti. Unë besoj se nuk keni marrë asnjë hap të tillë”, tha ai, përcjell Telegrafi.

Berisha thotë se Qeveria aktuale arsyetohet me atë se 20 vite më parë nuk janë marrë këta hapa nga qeveritë e kaluara.

“Përderisa ju nuk e keni bërë për një vit, nuk e bëni as për pjesën tjetër të qeverisjes”.

Berisha ka rekomanduar që gruri që është aktualisht ën hambarë të mos lejohet të eksportohet derisa ai që do të korret gjatë këtij viti të blihet nga Qeveria dhe të vendoset në rezervat shtetërore./Telegrafi/