Behar Maliqi po rikthehet

Feronikeli mund të frymojë më lehtë, pasi skuadrës nga Drenasi, pritet që brenda këtij muaji, ti kthehet në përbërje futbollisti kryesor, Behar Maliqi, i cili u lëndua në xhiron e 5-të kundër Gjilanit.

Një gjë të tillë, e ka pohuar për Gazetën Tribuna, mesfushori i “Niklit”
“Rikuperimi është duke shkuar mirë. Deri me tani kam qenë me terapi dhe me fitnes, kurse nga sot do të filloj të vrapoj. Besoj që brenda një muaji do të rikthehem”, ka deklaruar Maliqi.

I pyetur se a do të jetë i gatshëm për ndeshjen derbi kudër liderit, Trepça ’89, që do të luhet në kuadër të javës së 11-të, Maliqi ka thënë që do ta bëjë të pamundurën që të jetë në fushë përballë mitrovicasve, por ai theksoi se pa qenë i gatshëm dhe pa e marr konfirmimin nga mjeku, nuk do të rrezikojë që të rikthehet para kohës.

Behar Maliqi i ka lënduar ligamentet në ndeshje kundër Gjilanit, në kuadër të javës së 5-të, takim që u fitua nga gjilanasit me rezultat 1:0.

Në katër ndeshje sa i ka luajtur Feronikeli pa Behar Maliqin, i ka pësuar 3 humbje, por edhe përkundër humbjeve, renditet në vendin e dytë, me tri pikë më pak se Trepça ’89 që është e para.

Është e sigurt që Maliqi do të mungon kundër Besës dhe Vushtrrisë, ndërkaq mbetet në pikëpyetje nëse ai do të jetë i gatshëm kundër 89-shit /Gazeta Tribuna/