Basketbollist dhe sprinter

Qëndrim Ajazaj është 21 vjeç, por numri i medaljeve, i mirënjohjeve e trofeve kalon për shumë herë këtë numër.

Basketbollisti nga Prizreni është shumë i suksesshëm edhe në atletikë, shkruan sot “Koha Ditore”. Ajazaj tashmë gjashtë vjet merret aktivisht më të dyja sportet, të cilat nuk mund t’i ndajë. Basketbolli dhe atletika janë sportet e tij.

Si basketbollist, Ajazaj krahas Bashkimit ku edhe e ka nisur karrierën, ka luajtur edhe për Vëllaznimin dhe së fundi për Kerasan Prishtinën në Superligën e Kosovës.

Luan në pozitat dy dhe tre. Sa i përket atletikës, është i fokusuar në disiplinat e vrapimeve të shkurtra: 60, 100 dhe 200 metra. Ajazaj është rekordmen i Kosovës në vrapimin prej 60 metrave, me kohë prej 6.85 sekondave.

“Merrem me basketboll dhe atletikë. Në atletikë jam pjesë e disiplinave të shkurtra, kurse në 60 metra jam rekordmen i Kosovës”, thotë Ajazaj, i cili së fundi i është bashkuar klubit të atletikës Gërmia nga Prishtina për shkak të studimeve në Degën e stomatologjisë.