Bashkatdhetarët “vërshojnë” Kuvendin e Kosovës, kanë kritika për deputetët

Për dy ditë radhazi Kuvendi i Republikës së Kosovës ka hapur dyert për të gjithë bashkatdhetarët, të cilët janë kureshtarë ta vizitojnë tempullin e legjislativit të vendit, por edhe të bashkëbisedojnë me deputetët.

Të shumtë ishin bashkatdhetarët që kishin ardhur për të takuar deputetët. E, në mesin e tyre ishte edhe Ali Ilazi.

Bashkatdhetari Ilazi në një prononcim për Telegrafin tregoi se nuk vjen për herë të parë në ambientet e Kuvendit.

Pas takimit me deputetët, Ilazi tregoi se drejtoi disa kritika për ta.

“Nga televizori ndryshojnë shumë. Nuk vij për herë të parë. Vij gati çdo vit. Nga ajo që shohim në TV dhe kur vijmë këtu ka ndryshime. Ato ndryshime dhe vërejtjet tona besoj që janë me vend”, tha ai.

Edhe Xhabir Vladi, nga komuna e Ferizajt, tha se para deputetëve paraqiti disa shqetësime të tij.

“I paraqita disa shqetësime në Kuvend. Ato rrëmujat që kanë ndodhë në Kuvend, për ne kanë qenë të papranueshme, pasi ne jemi një demokraci e re. Që 20 vite kemi dalë nga lufta dhe nuk kemi pas nevojë për ato rrëmuja”, tha ai, duke tërhequr një paralele me shtetin aktulisht ku jeton, Zvicrën.

Ndërsa, bashkatdhetari Ramiz Arifi, i cili kishte ardhur me familjen e tij, tha se u njoftuan nga afër me punën që bëhet në Kuvend.

“Meqë Kuvendi i Kosovës ka hap dyert për dy ditë për diasporën tonë dhe me plot dëshirë erdha me familjen  në Parlamentin e Kosovës mu u njoftu me punën, me njerëzit që punojnë e që miratojnë ligje dhe ofrojnë shërbime të tjera”, u shpreh ai.

Bashkatdhetari tjetër, Skender Nokaj, Kuvendin e Kosovës e quajti “Tempull i lirisë”.

“Kur vizitojmë Kosovën, dëshira jone e madhe është që të vizitojmë tempullin e lirisë.  Këtu janë edhe themelet e Kosovës, besoj”.

Ndërsa, deputeti i Lëvizjes Vetëvendosjes, Jahja Kokaj,  i cili i priti disa nga bashkatdhetarët duke dëgjuar me shumë vëmendje të gjitha shqetësimet e tyre tha se ka parë emocione dhe dashurinë e madhe që kanë për atdheun.

“Sot e dje ishin dy ditë të veçanta ngase ishin këta vëllezërit dhe motrat tona që jetojnë dhe punojnë në diasporë. Aty pashë si zakonisht emocionet e tyre dhe dashurinë e jashtëzakonshme për atdheun. Prandaj ky reflektim i dashurisë për atdhe është shumë i nevojshëm për të gjithë njerëzit, edhe për parlamentarët”, ka thënë Kokaj. /Telegrafi/