Babai i njërit nga të arrestuarit për terrorizëm: Djali është praktikues i fesë sikurse e gjithë familja, ne s’kemi dyshuar kurrgjë tek ai

Pesë të arrestuarit për terrorizëm kanë dalur para gjykatës së Prishtinës nën dyshimet se kishin planifikuar sulme terroriste në Kosovë.

Fazli Syla nga fshati Bukshiq i Klinës, babai i njërit nga të arrestuarit për terrorizëm, ka thënë se djali i tij është praktikues i fesë, por që familja nuk ka dyshuar në të asgjë.

Në një deklaratë para mediave, ka thënë se djali i tij, nuk punon askund dhe se merret me kultivimin e pulave.

“E kanë arrestua që tri ditë po erdha ta shohë sot djalin po s’me lejonë më pa. Djali është marr më pula, s’ka punu askund. Është praktikues i fesë sikur e gjithë familja po skemë dyshua kurrgjë. Ka shkuar në xhami e ka fal xhumanë s’ka pas tjetër lëvizje.

Lexo po ashtu Pesë të arrestuarit që po dyshohen se planifikuan sulme terroriste, dalin para gjykatës në Prishtinë

Tutje ka treguar se djali i tij është arrestuar edhe më herët për të njëjtën vepër.

“Edhe vite më parë është arrestuar po s’ka nejt shumë në burg për të njëjtën vepër. Djali është i martuam i ka tre fëmijë”, tha Syla.

Ndërkaq, Prokuroria Speciale (PSRK) ka kërkuar nga Gjykata Themelore në Prishtinë që t’ua caktojë masën e paraburgimit të dyshuarve për terrorizëm A.GJ, E.S,N.S, M.B dhe SH.K

Sipas prokurorisë, A,GJ, E.G dhe N.S po dyshohen se kanë kryer veprën penale “përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës” lidhur me veprën penale “kryerja e veprës terroriste”.

Kurse, M.B po dyshohet se ka kryer veprat penale “përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës” lidhur me veprën penale “kryerja e veprës terroriste” dhe “mbajtja në pronësi, kontroll ose posedim të paautorizuar të armëve”.

Ndërkaq, SH.K po dyshohet se ka kryer veprën penale “importi, eksporti, furnizimi, transportimi, prodhimi, ndërmjetësimi dhe shitja e paautorizuar e armëve apo materieve plasëse”.

Në kërkesën e prokurorisë  thuhet se ekziston frika se të pandehurit po të mbrohen në liri mund t’i qasen arratisë për t’i ikur përgjegjësisë penale para së cilës ndodhen dhe në këtë mënyrë do të jenë të paqasshëm për drejtësinë./Telegrafi/