Australia ngre alarmin e kërcënimit nga terrorizmi mes tensioneve mbi luftën Izrael-Hamas

Qeveria australiane ka ngritur alarmin e kërcënimit nga terrorizmi i mundshëm në vend, duke përmendur shqetësimet rreth rritjes së radikalizmit midis të rinjve dhe tensioneve mbi luftën Izrael-Hamas.

Bëhet e ditur se kjo është hera e parë që niveli i kërcënimit është ngritur për pesë nivele që nga nëntori i vitit 2022.

Për tetë vitet e fundit, niveli i kërcënimit ka mbetur në “i mundshëm”.

Megjithatë, kryeministri australian Anthony Albanese tha se ndërsa zyrtarët qeveritarë besojnë se terrorizmi është një rrezik në rritje, ata nuk janë të vetëdijshëm për ndonjë kërcënim të veçantë.

“Dua të siguroj australianët se e mundshme nuk do të thotë e pashmangshme dhe nuk do të thotë se ekziston një kërcënim ose rrezik i afërt”, tha Albanese.

Gjithashtu, kryeministri australian ka njoftuar se qeveria e tij po vepron sipas këshillave të agjencisë vendase të spiunazhit, shkruan euronews.

“Këshilla që kemi marrë është se më shumë australianë po përqafojnë një gamë më të larmishme ideologjish ekstreme dhe është përgjegjësia jonë të jemi vigjilentë”, tha Albanese.

“Ne kemi parë një rritje globale të dhunës dhe ekstremizmit të motivuar politikisht. Shumë shtete demokratike po punojnë për ta adresuar këtë, duke përfshirë miqtë tanë në SHBA dhe në Mbretërinë e Bashkuar. Ka shumë gjëra që e shtyjnë këtë prirje globale drejt dhunës. Qeveritë në mbarë botën janë të shqetësuara për radikalizimin e të rinjve, radikalizimin online dhe ngritjen e ideologjive të reja të përziera”, shtoi ai.

Ndryshe, autoritetet australiane deklaruan për herë të fundit një akt terrorist në prill, kur një djalë 16-vjeçar u akuzua për therjen me thikë të një peshkopi të Sidneit. /Telegrafi/