Atanasov: Përfshirja e bullgarëve në Kushtetutë është një çështje e kotë

Bullgaria duhet të lejojë negociatat e Maqedonisë së Veriut me BE-në pa kushtëzuar përfshirjen e bullgarëve në Kushtetutë.

Këtë e theksoi Dimitar Atanasov nga Instituti i Etnologjisë dhe Studimeve Folklorike me Muzeun Etnografik të Akademisë së Shkencave bullgare në konferencën finale: “Demitizimi i marrëdhënieve (jo)fqinjësore në rrugën drejt BE-së: Rasti i Maqedonisë së Veriut dhe Bullgarisë”, të organizuar nga Eurothink – Qendra për Strategji Evropiane – Shkup, e cila u mbajt sot në Shkup.

Atanasov beson se përfshirja e bullgarëve në Kushtetutë është një çështje absolutisht e kotë, ndërsa Bullgaria duhet të lejojë negociatat e Maqedonisë së Veriut në BE.

Nëse shikojmë historikisht, thotë Atanasov, të dyja palët argumentojnë për teza historike.

“Po t’i shikojmë figurat historike, Goce, Dame, ata donin që Bjeshkët e Osogovës të mos kishin kufij, donin që Deve Bairi dhe Gjuesheva të ishin vetëm dy fshatra dhe asgjë më shumë dhe të kalonin lirisht mes tyre. Sepse ne jemi të ndryshëm, por mjaft të afërt. Atë që mund ta bëjnë italianët, spanjollët dhe francezët, pse të mos e bëjmë edhe ne bullgarët dhe maqedonasit”, tha Atanasov.

Lidhur me marrëdhëniet mes Maqedonisë së Veriut dhe Bullgarisë për momentin, historiani thotë se ato janë në humnerë, ndërsa për këtë kanë kontribuar nismat për hapjen e të ashtuquajtur klubet kulturore në të dyja vendet./Telegrafi/