Ankesat e banorëve për papastërti, reagon NPB: Këto ankesa nuk qëndrojnë

Gjatë ditës së hënë, banorët e ndërtesës Ulpiana C7, hyrja 6 u ankuan dhe shprehën pakënaqësitë e tyre ndaj shërbimeve të NPB-së.

Nga Ndërmarrja Publike Banesore NPB, në lidhje me këtë çështje, për Telegrafin u deklarua Gazmend Xhelili, Udhëheqës i Divizionit për Mirëmbajtje dhe Pastrim, i cili tha se  këto ankesa të banorëve nuk qëndrojnë.

“Kjo nuk qëndron, ne kemi fakte që nuk qëndron. Ne pastrojmë dy herë në javë hyrjen që i marrim në kontrata me pëlqimin e banorëve. Domethënë ata vijnë i lexojnë kontratat që duhet me i lexu edhe i pranojnë kushtet. Ne e kemi dy herë ne javë pastrimin e hapësirave të brendshme, shkallët e këto, e kemi një herë në muaj merimangat, gilinderat dhe dritaret e brendshme”, tha ai.

Sipas Xhelilit, mbeturinat mund të hidhen nga ndonjë person qëllimisht.

“Mundet për shembull pastruesi ynë sot me hy me pastru dhe të nesërmen del dikush i gjuan dy letra dhe bën foto, dhe bën ankesë. Ne ato i inspektojmë dhe dalim i shikojmë a qëndron ajo. Ka edhe prej banorëve që e bëjnë qëllimisht, sidomos borxhlinjtë që kanë borxhe te na, mundohen me u anku në pastrim, mundohen me u anku në gjana që edhe nuk janë tonat”, tha ai.

Lexo po ashtu Banorët e lagjës Ulpiana në Prishtinë në hall me NPB-në, thonë se kompania sjellë faturat mujore pa i përmbushur obligimet 

Veç kësaj, ai tha se në momentin që një punëtor hyn për të pastruar ai protokollohet, kush ka qenë dhe datën që ka qenë.

“Çdo punëtor që hyn në hyrje pasi ta përfundon pastrimin është i obliguar të nënshkruhet me datë edhe cili punëtorë ka qenë”, tha ai.

Sa i përket kërkesave të banorëve të cilat i kanë në email drejtuar NPB-së, Xhelili tha se përgjigjet janë kthyer.

“Këta kanë qenë pesë vite kontratë me neve, pesë vite ju kemi ofrua shërbime, nëse se merr një shërbim të mirë për pesë vite, pse e vazhdon prapë. Kjo ka qenë tendencioze nuk e di arsyen”, tha ai. /Telegrafi/.