Angellov: OBRM-PDUKM-ja është në qeveri me bartësin e Deklaratës shqiptare

Kryetari i partisë maqedonase “Dinjiteti”, Stojançe Angellov, sot në një konferencë për shtyp deklaroi se Gruevski i fton qytetarët të mbrojnë Maqedoninë nga sulmet e partisë shqiptare, por harron se ai është në koalicion me BDI-në, që sipas Angellovit është bartëse e Deklaratës së partive shqiptare. Ai gjithashtu theksoi se OBRM-PDUKM-ja ka mjete legale me të cilat mund të bllokojë ligjet me të cilat do të kërcënohej unitariteti i Maqedonisë, përcjell Telegrafi Maqedoni.

Ai i bëri thirrje OBRM-PDUKM-së të dalë nga qeveria me BDI-në dhe pastaj të bëjë thirrje për mbrojtje të Maqedonisë. Angellov ftoi pjesëtarët e iniciativës “Për Maqedoni të përbashkët” të bëjnë presion mbi ministrat e OBRM-PDUKM-së të cilët koalicionojnë me partinë, siç thonë, dëshiron ta federalizojë Maqedoninë.

“Bartësit e platformës janë partitë shqiptare, mes të cilave edhe BDI-ja. Në këtë moment funksionon qeveri teknike nga OBRM-PDUKM-ja dhe BDI-ja. Në të njëjtën kohë Gruevski ju bën thirrje qytetarëve ta mbrojnë Maqedoninë nga sulmet e platformës, ndërsa ai është në koalicion me bartësen e asal platforme”, deklaroi Angellov./Telegrafi/