Analistët: Rusisë i konvenon një marrëveshje mes Kosovës dhe Serbisë (Video)

Analisti Ilir Mirena ka thënë se një marrëveshje e mundshme mes Serbisë dhe Kosovës do të shkonte në favor të Rusisë.

“Pse të mos i konvenoj Rusisë një marrëveshje e mundshme Kosovë- Serbia, kur e dimë se tri territore duke përfshirë Krimenë, Osetinë e Jugut dhe Abkhazinë do të përdoreshin në situatën ideale për Rusinë në krahasim me Kosovën”, thotë Mirena.

“Qysh në fillim kur e ka aneksuar Krimënë, Rusia e ka përmendur Kosovën”, tha Mirena në “Debat Plus” në RTV Dukagjini.

Analisti thotë se historia e ka treguar se Rusia jo gjithmonë i ka qëndruar në krah Serbisë.

Mirena thotë se është e qartë se Thaçi ka mbështetje ndërkombëtare për idenë e tij në raport me kufijtë.

“Erdhi kancelari i Austrisë, një udhëheqës i një vendi të BE-së, dhe tha merruni vesh keni mbështetje ndërkombëtare”, deklaroi Mirena.

Ndërsa, analisti tjetër Astrit Gashi ka thënë se nuk ka dyshim se një pjesë e bashkësisë ndërkombëtare e përkrahë idenë e Thaçit për ndryshimin e kufijve.

“Një pjesë e bashkësisë ndërkombëtare është treguar më e hapur, por një pjesë tjetër, sidomos Gjermania e kundërshton idenë për prekje të kufijve”, tha Gashi, përcjell Telegrafi.

Duke folur për takimin Thaçi- Putin, Gashi ka thënë se më herët është përmendur se Vuçiqi kishte premtuar se do të ndërmjetësoj një takim të tillë.

“Nëse Vuçiqi ka qenë kumbara e këtij takimi atëherë na vijnë shumë pikëpyetje se çfarë mund të jetë diskutuar në ato shtatë minuta të atij takimi, dhe rezultatet e atij takimi”, deklaroi Gashi.

“Nëse SHBA do të kishte ndërmjetësuar atë takim situata do të ishte më ndryshe, por nëse aty e ka dërguar Vuçiqi ose Erdogani, ne do duhet të jemi skeptik për rezultatin e atij takimi”

“Thaçi vet e tregoi se çfarë ka biseduar në atë takim, për atë që ai po e quan demarkim të kufirit, e që nuk e ka përkrahjen e brendshme por e ka atë të Vuçiqit e të një pjese të bashkësisë ndërkombëtare”, tha Gashi./Telegrafi/