Të gjithë burra dhe të gjithë mbi 60 vjeç: Njihuni me shtatë drejtuesit e rinj të Kinës (Foto)

Partia Komuniste e Kinës njoftoi publikisht Komitetin e Përhershëm të Byrosë Politike, një grup i fuqishëm prej shtatë drejtuesish, të cilët do të jenë në krye të ekonomisë së dytë më të madhe në botë gjatë pesë viteve të ardhshme.

Pesë nga shtatë anëtarët e Komitetit të Përhershëm janë të rinj në skenën politike, ndërsa presidenti kinez, Xi Jinping dhe kryeministri, Li Keqiang i përkasin rrethit politik më me influencë në vend.

Përveç rizgjedhjes si Sekretar i Përgjithshëm i Komitetit Qendror të PKK-së, Xi Jinping-u gjithashtu ka ruajtur postin e kryetarit të Komisionit Qendror Ushtarak.

Duke pranuar mandatet e reja në këto poste edhe për pesë vjetët e ardhshëm, lideri 64-vjeçar u shpreh se ndihet i inkurajuar nga mbështetja e Partisë: “Unë u rizgjodha Sekretar i Përgjithshëm i Komitetit Qendror të PKK-së. Unë e shoh këtë jo vetëm si miratim të punës sime, por edhe si një nxitje”.

Më poshtë vijon lista e drejtuesve më të fuqishëm në Kinë (sipas pushtetit që kanë në parti) të cilët do të sundojnë 1.4 miliardë njerëz për pesë vitet e ardhshme, përcjell Tirana Observer.

Detaji më interesant shkruan CNN është se të gjithë janë burra dhe të gjithë janë mbi moshën 60-vjeçare.

Xi Jinping, 64 vjeç, ka konfirmuar mandatin e tij të dytë si lideri i Partisë Komuniste dhe presidenti i vendit.

Gjatë pesë viteve të para në detyrë, ai arriti të rriste nivelin e pushtetit dhe të vlerësimit në atë të liderit themelues të Kinës Komuniste, Mao Ce Dunit.

Ambicia më e madhe e Xi-së është të ndërtojë Kinën si një superfuqi globale, megjithëse ai është kritikuar për moszbatimin e reformave të nevojshme ekonomike dhe masat e ashpra ndaj lirive civile.

Li Keqiang, 62 vjeç, është kreu i qeverisë dhe përgjegjës për ekonominë e Kinës.

Gjatë mandatit të tij të parë, aleati i ish-presidentit, Hu Jintao humbi disa nga kompetencat e tij , të cilat i kaluan Xi-së duke e vendosur atë në krye të komiteteve ekonomike të nivelit të lartë.

Li Zhanshu, 67 vjeç, është aleati më i besueshëm i Xi-së në Komitetin e përhershëm të Byrosë Politike.

Ish-shefi i stafit të Xi-së, Li mund të kryesojë parlamentin e vendit, Kongresin Popullor Kombëtar.

Wang Yang, 62 vjeç, ish-zëvendëskryeministri i njohur për mbështetjen e reformave ekonomike.

Ai është i vetmi anëtar i ri i Komitetit të përhershëm të Byrosë Politike, i cili nuk është pjesë e të afërmve të Xi-së.

Të dy, Wang dhe Li Keqiang i përkasin fraksionit të Partisë së Lidhjes Rinore Komuniste.

Wang Huning, 62 vjeç, është teoricieni kryesor i partisë.

Ai ka shërbyer si këshilltar i tre presidentëve dhe ka ruajtur një marrëdhënie të ngushtë me Xi-në.

Ai besohet të jetë përgjegjës për propagandën, ideologjinë dhe organizimin e partisë.

Zhao Leji, 60 vjeç, është kreu i ri i Komisionit Kundër Korrupsionit, i cili më parë ka drejtuar departamentin e organizimit të partisë përgjegjës për çështjet e personelit.

Gjithashtu, ai ka punuar si sekretar i Partisë së Shaanxi, vendi i origjinës së XI-së.

Han Zheng, 63 vjeç, ish- sekretari i Partisë në Shangai dhe ish-kryebashkiaku i qytetit.

Ai është pjesë e klikës së Shangait dhe ka premtuar se do të jetë besnik ndaj Xi-së.