Spanja do të mbajë tri ditë zie për viktimat e aksidentit të trenave

Kryeministri spanjoll Pedro Sanchez ka shpallur tre ditë zie kombëtare për viktimat e një aksidenti treni me shpejtësi të lartë që ia mori jetën të paktën 40 personave.

Sanchez gjithashtu premtoi të zbulojë arsyen pse dy trenat me shpejtësi të lartë u përplasën në Spanjën jugore, ndërsa ekipet e shpëtimit vazhdojnë të kërkojnë rrënojat.

Më shumë se 120 persona të tjerë u lënduan ndërsa vagonët e një treni që shkonte në Madrid dolën nga shinat dhe kaluan në shinat e kundërta, duke u përplasur me një tren që vinte përballë në Adamuz të dielën në mbrëmje.

Aksidenti është më i keqi që vendi ka parë në më shumë se një dekadë, transmeton Telegrafi.

Operatori i rrjetit hekurudhor Adif tha se përplasja ndodhi në orën 19:45 të dielën, rreth një orë pasi njëri prej trenave u nis nga Malaga duke u drejtuar në veri të Madridit, kur doli nga shinat në një pjesë të drejtë të binarëve pranë qytetit të Kordobës.

Forca e përplasjes i shtyu vagonët e trenit të dytë në një argjinaturë, sipas Ministrit të Transportit Óscar Puente. Ai shtoi se shumica e të vrarëve dhe të plagosurve ishin në vagonët e parë të trenit të dytë, i cili po udhëtonte në jug nga Madridi për në Huelva.

Ekipet e shpëtimit thanë se rrënojat e shtrembëruara të trenave e bënë të vështirë nxjerrjen e njerëzve të bllokuar brenda vagonëve.

Sanchez vizitoi vendin e aksidentit me zyrtarë të lartë të hënën pasdite.

"Kjo është një ditë pikëllimi për të gjithë Spanjën, për të gjithë vendin tonë", u tha ai gazetarëve.

"Do të arrijmë në të vërtetën, do të gjejmë përgjigjen dhe kur kjo përgjigje në lidhje me origjinën dhe shkakun e kësaj tragjedie të dihet, pasi nuk mund të ishte ndryshe, me transparencë absolute dhe qartësi absolute, do ta bëjmë publike", shtoi ai.

Puente tha se një hetim mund të zgjasë të paktën një muaj, duke e përshkruar incidentin si "jashtëzakonisht të çuditshëm". /Telegrafi/