Rubio për Ukrainë-Rusi: Kjo nuk është lufta jonë, kjo është një luftë në një kontinent tjetër

Sekretari amerikan i Shtetit, Marco Rubio theksoi se për SHBA-në, lufta në Ukrainë nuk është një përplasje direkte e vendit të tyre, por një luftë që zhvillohet në një kontinent tjetër.

Ai nënvizoi se roli i Amerikës duhet të jetë mbështetës dhe diplomatiko-strategjik, duke ndihmuar në zgjidhjen e krizës pa u përfshirë drejtpërdrejt në luftimet e frontit.

Sipas tij, vendimi mbi rrjedhën e mëtejshme të konfliktit do t’i lihet vetë palëve të përfshira: Ukrainës dhe Rusisë.

Rubio saktësoi se "nuk bëhet fjalë për të imponuar ndonjë marrëveshje tek dikush", duke theksuar rëndësinë e dialogut dhe negociatave midis dy vendeve për të arritur një zgjidhje paqeje të qëndrueshme.

Ai gjithashtu vuri në dukje se presidenti amerikan, Donald Trump kishte mbajtur më shumë takime dhe diskutime mbi luftën në Ukrainë sesa mbi çdo temë tjetër gjatë mandatit të tij, duke përfshirë edhe çështjet tregtare.

Ky fakt, sipas tij, tregon se konflikti ukrainas ka qenë një çështje qendrore në agjendën e udhëheqësve amerikanë dhe se rëndësia e saj diplomatike dhe strategjike nuk mund të nënvlerësohet.

Në këtë kontekst, Rubio sugjeroi që SHBA duhet të vazhdojë të mbështesë Ukrainën përmes ndihmës humanitare, ekonomike dhe ushtarake, pa u përfshirë drejtpërdrejt në përplasjet luftarake, duke ruajtur një qasje të balancuar midis ndihmës dhe shmangies së përfshirjes direkte në konflikt. /Telegrafi/