Romeo Beckham, djali 23-vjeçar i David dhe Victoria Beckham, do të bëjë debutimin e tij në aktrim me filmin “Forty Love”, i cili pritet të dalë në kinema më vonë gjatë këtij viti.
Pas tërheqjes nga futbolli në vitin 2024, ku ishte pjesë e ekipit B të Brentfordit, Romeo po nis një kapitull të ri në Hollywood.
Filmi, i drejtuar nga Pierre-Ange Carlotti, zhvillohet në Rivierën Franceze dhe rrëfen historinë e Sacha Gallo, një talent i tenisit që stërvitet me të atin me synimin për të fituar një trofe të madh në Paris.
Megjithatë, planet e tij ndryshojnë kur përballet me një rival të ri, të interpretuar nga Romeo, i cili jo vetëm sfidon aftësitë e tij sportive, por edhe i vë në pikëpyetje bindjet për jetën dhe veten.
Sipas përshkrimit të filmit, protagonisti përballet për herë të parë me një kundërshtar krejt ndryshe, dashurinë, e cila paraqitet si një forcë emocionuese, por edhe destabilizuese.
“Forty Love” përshkruhet si një histori romantike dhe e ndjeshme mbi rritjen, sportin e nivelit të lartë dhe emocionet që fshihen pas suksesit.
Në kastin e filmit bëjnë pjesë edhe Paul Kircher, Guillaume Canet, Catherine Deneuve dhe Benjamin Voisin, ndërsa muzika do të realizohet nga 070 Shake dhe Johan Lenox.
Ndërkohë, është publikuar edhe imazhi i parë i Romeo Beckham në rol, ku ai shfaqet me flokë shumë të shkurtra përballë kolegut të tij Paul Kircher. /Telegrafi/