Ngadalësohet sërish dhënia e kredive në Eurozonë

Rritja e dhënies së kredive për kompanitë e Eurozonës u ngadalësua përsëri në muajin korrik, duke shtuar zërat se normat e larta të interesit po frenojnë krijimin e kredisë dhe rritjen ekonomike.

Sipas një raporti të Bankës Qendrore Evropiane (BQE), kredia për kompanitë në bllokun Eurozonës u zgjerua me 2.2 për qind nga viti në vit pas një leximi prej 3 për qind një muaj më parë, ndërsa rritja e kredisë për familjet u ngadalësua në 1.3 për qind nga 1.7 për qind në qershor,

BQE rriti normat e interesit për të nëntën herë radhazi në korrik, duke rritur normën që ajo paguan për depozitat e bankave nga 3.5 për qind në 3.75 për qind, niveli më i lartë që nga viti 2000, përpara se kartëmonedhat dhe monedhat euro të futeshin në qarkullim.

Me 5.3 për qind në korrik, inflacioni mbetet shumë mbi objektivin e bankës dhe mund të duhet deri në vitin 2025 që të bjerë në objektivin prej 2 për qind. Të dhënat ekonomike në gusht treguan se rënia e aktivitetit të biznesit në Eurozonë u thellua shumë më tepër sesa mendohej këtë muaj në një rënie të gjerë në të gjithë rajonin.

Treguesit e rritjes ekonomike po tregojnë një tkurrje në tremujorin e tretë, pavarësisht nga ai që mund të cilësohet si një sezon turistik rekord. Të dhënat e dobëta po intensifikojnë debatin se sa më shumë duhet të bëjë BQE.

Masa e ofertës monetare, e parë në të kaluarën si një tregues i mirë i zgjerimit të ardhshëm ekonomik, u tkurr me 0.4% në korrik në një kthesë nga rritja prej 0.6 për qind në qershor. /Telegrafi/