Jorge Messi nuk ishte vetëm babai i Lionel Messit. Për vite me radhë, ai ishte njeriu që qëndroi pranë tij në momentet më të vështira dhe mori disa prej vendimeve që ndikuan drejtpërdrejt në rrugëtimin e tij drejt majës së futbollit.
Ndarja nga jeta e Jorge Messit, në moshën 68-vjeçare, rikthen në vëmendje historinë e një marrëdhënieje që shkon shumë përtej asaj mes një babai dhe djalit të tij.
Përpara se Lionel Messi të bëhej kampion bote, fitues i shumë trofeve dhe një prej emrave më të mëdhenj të historisë së futbollit, ai ishte thjesht një djalë i talentuar nga Rosario. Dhe pas tij qëndronte Jorge, i cili duhej të gjente rrugën për ta bërë talentin e të birit të mbijetonte përballë pengesave të para.
Një problem shëndetësor që rrezikonte ëndrrën
Historia nisi në Rosario, aty ku Leo hodhi hapat e parë në futboll. Ai u bashkua me Newell’s Old Boys në moshën gjashtëvjeçare dhe shumë shpejt u bë e qartë se kishte diçka të veçantë.
Megjithatë, talenti nuk mjaftonte. Messi kishte nevojë për trajtim me hormon të rritjes dhe kostoja e tij ishte e lartë. Me kalimin e kohës, Newell’s nuk mundi ta vazhdonte financimin e trajtimit.
Për Jorgen, kjo nënkuptonte se duhej të gjente një klub që të ishte i gatshëm të investonte jo vetëm te futbollisti i ri, por edhe te nevojat e tij mjekësore.
U shqyrtuan mundësi të ndryshme. River Plate ishte një prej tyre, ndërsa në Spanjë kishte interes edhe nga klube si Real Madridi dhe Atletico Madridi.
Por Jorge kishte vendosur të provonte një tjetër rrugë, Barcelona ishte destinacioni që ai synonte.
Një udhëtim që ndryshoi gjithçka
Në vitin 2000, Jorge udhëtoi me djalin e tij drejt Spanjës. Leo ishte vetëm 13 vjeç dhe po largohej nga Argjentina për të provuar mundësinë e jetës në akademinë e Barcelonës.
Klubi katalanas e kuptoi shpejt se kishte përballë një talent të jashtëzakonshëm. Carles Rexach ishte ndër ata që u bindën për potencialin e argjentinasit.
Por Barcelona nuk ishte gati ta mbyllte menjëherë marrëveshjen.
Problemet financiare dhe pasiguritë rreth investimit për një 13-vjeçar bënë që procesi të zvarritej. Për Jorgen, kjo ishte një situatë që nuk mund të vazhdonte pafundësisht.
Nëse Barcelona nuk merrte një vendim, ai duhej të shikonte alternativa të tjera.
Dhe kështu mbërritëm te një prej momenteve më të famshme të historisë së futbollit.
Marrëveshja që u shkrua në pecetë
Në dhjetor të vitit 2000, gjatë një takimi në një klub tenisi në Barcelonë, situata mori një kthesë vendimtare.
Jorge kërkonte siguri. Ai nuk mund ta mbante djalin e tij në Spanjë pa e ditur nëse Barcelona do të merrte përsipër të ardhmen e tij.
Carles Rexach më në fund dha sinjalin që familja priste. Në një pecetë u shkrua premtimi për të nënshkruar me Lionel Messin.
Mund të dukej si një mënyrë e pazakontë për të mbyllur një marrëveshje, por ajo copë letër u bë më vonë një prej objekteve më të famshme në historinë e futbollit.
Peceta u ruajt për vite dhe më vonë u shit në ankand për rreth 762 mijë paund.
Në thelb, ajo shënoi momentin kur Barcelona vendosi të merrte përsipër një nga bastet më të mëdha të historisë së saj.
Jorge zgjodhi të qëndronte
Leo duhej të përballej me një tjetër sakrificë. Nëna e tij, Celia, dhe pjesa tjetër e familjes u kthyen në Rosario, ndërsa Jorge vendosi të qëndronte në Spanjë pranë djalit.
Messi ishte vetëm 13 vjeç dhe largimi nga familja ishte një barrë e madhe emocionale.
Më vonë, Leo ka folur për vështirësitë e asaj periudhe dhe për faktin se ai dhe babai i tij përpiqeshin ta përballonin situatën pa e shfaqur gjithmonë atë që ndjenin.
Për Jorgen, megjithatë, vendimi ishte i qartë: djali i tij nuk do ta përjetonte i vetëm atë aventurë.
Ai qëndroi pranë Leos ndërsa ai nisi të ngjitej në strukturat e Barcelonës dhe të tregonte se investimi i klubit kishte qenë i drejtë.
Kur Jorge u bë negociatori i Leos
Me rritjen e Messit, ndryshoi edhe përgjegjësia e babait të tij.
Në vitin 2004 erdhi kontrata e parë profesionale me Barcelonën. Nga ai moment, Jorge u bë një prej figurave kryesore në menaxhimin e marrëdhënies së të birit me klubin.
Messi po shndërrohej në një yll dhe klubet më të mëdha të Evropës nisën ta ndiqnin me interes.
Në këtë panoramë u shfaq edhe Real Madridi.
Interesimi i rivalëve i dha Jorges një tjetër element për të përdorur në negociata. Barcelona duhej të tregonte se e konsideronte Messin një lojtar të veçantë dhe se ishte e gatshme të bënte përpjekjet e nevojshme për ta mbajtur.
Jorge nuk ishte i gatshëm që djali i tij të trajtohej si një futbollist i zakonshëm. Ai e dinte vlerën që kishte Leo dhe përdori interesimin nga klubet e tjera për të mbrojtur interesat e tij.
Kjo qasje do ta shoqëronte për pjesën më të madhe të karrierës së Messit.
Nga momenti kur mori përsipër të gjente një zgjidhje për trajtimin e djalit të tij, te udhëtimi drejt Barcelonës, marrëveshja e shkruar në një pecetë dhe negociatat për kontratat e ardhshme, Jorge Messi ishte një figurë e rëndësishme në prapaskenën e historisë së Lionel Messit.
Leo e shkroi legjendën e tij me këmbët në fushë. Por pas atij rrugëtimi ishte një baba që, që në moshën 13-vjeçare të të birit, vendosi të rrezikonte gjithçka për t’i dhënë atij mundësinë të bëhej i madh. /Telegrafi/