Prokuroria Themelore e Pejës në bashkëpunim me Policinë e Kosovës, qysh në orët e mëngjesit të së enjtes kanë ndërmarr një aksion në kompaninë e pastrimit “Ambienti” në Pejë.
Burimet e Telegrafit bëjnë të ditur gjatë këtij aksioni nëntë persona janë shoqëruar në stacion policor, pasi dyshohen se kanë keqpërdorur pozitën zyrtare, paranë publike.
Sipas të njëjtave burime, personat e shoqëruar në polici janë anëtarë të bordit të ndërmarrjes, zyrtarë si dhe ish-zyrtarë.
Ndërkaq, Prokuroria përmes një komunikate për media ka njoftuar se gjatë urdhër-kontrollit janë siguruar prova të shumta materiale të cilat do shërbejnë për procedurën hetimore në ketë proces penal.
"Prokurori i shtetit nga Departamenti i Krimeve të Rënda në Prokurorinë Themelore në Pejë, ka urdhëruar të ndalohen për 48 orë, 7 persona të cilët dyshohen që me veprimet e tyre kanë kryer veprat penale “Keqpërdorim i pozitës zyrtare apo autoriteti zyrtar”, “Legalizimi i përmbajtjes se pavërtetë” dhe “Deklarim i rremë”.
Prokuroria Themelore në Pejë do t’i ndërmarrë të gjitha veprimet e nevojshme hetimore që kjo çështje penale të ndriçohet", thuhet në komunikatën për media. /Telegrafi/