Kuba goditet nga tërmete të forta - pamje që tregojnë fuqinë e vërtetë të lëkundjeve

Disa tërmete të forta kanë goditur brigjet jugore të Kubës, duke shkaktuar dëme dhe rrëshqitje të dheut.

Tërmeti i parë me magnitudë 5.9 goditi rreth orës 10:50 të mëngjesit të së dielës, i ndjekur më vonë nga një tërmet më i madh me magnitudë 6.8, sipas të dhënave nga Shërbimi Gjeologjik i Shteteve të Bashkuara.

Bëhet e ditur se të dyja lëkundjet goditën në brigjet jugore të Bartolome Maso, shkruan yahoonews, përcjell Telegrafi.

I pari goditi rreth 35 kilometra nga qyteti, ndërsa i dyti 40 kilometra.

Presidenti Miguel Diaz-Canel i Kubës tha se shtëpitë dhe linjat e energjisë elektrike u dëmtuan nga tërmetet, të cilat gjithashtu kanë shkaktuar rrëshqitje dheu.

"Ne kemi filluar të vlerësojmë dëmin në mënyrë që të fillojmë rikuperimin. Gjëja e parë dhe më e rëndësishme është të shpëtojmë jetë", tha ai.

Ndryshe, tërmetet goditën Kubën pasi uragani i kategorisë 3 Rafael përshkoi vendin, duke lënë pas shkatërrime të mëdha. /Telegrafi/