Juventus mund të kursejë një shumë të madhe prej 15 milionë eurosh nëse Thiago Motta merr drejtimin si trajner i ri i Bayer Leverkusen.
Motta është përfolur si një nga kandidatët që klubi i Bundesligës po konsideron për të zëvendësuar trajnerin e mëparshëm të Manchester United, Erik Ten Hag, i cili u shkarkua pas vetëm dy ndeshjesh në krye të skuadrës.
Sipas asaj që ka publikuar TuttoMercatoWeb, kontrata e Mottas me Juventusin, e cila zgjat deri në vitin 2027, do të bëhet e pavlefshme nëse ai bashkohet me Leverkusen, duke shmangur kështu pagesën e shumës prej 15 milionë eurosh që klubi duhet t’i paguante trajnerit.
Megjithatë, Tuttosport raporton se Motta nuk është shumë i bindur për ofertën në Leverkusen, apo për ndonjë ofertë tjetër në këtë moment.
Trajneri thuhet se dëshiron të marrë një pushim dhe të shmangë projekte si ai i klubit gjerman, i cili ka humbur shumë nga potenciali i tij gjatë muajve të fundit, pas largimit të trajnerit Xabi Alonso për në Real Madrid dhe atyre të yjeve si Florian Wirtz dhe Jeremie Frimpong.
Duke vazhduar të marrë pagën nga ‘Bianconerët’, Motta nuk ka presion për t’u nxituar të pranojë një ofertë të re, por figurat kryesore në Juventus shpresojnë që ai të bindet së shpejti./Telegrafi/