FBI bastis kompaninë që prodhon “disqe alumini” për disa nga prodhuesit kryesorë të automjeteve
FBI bastisi të hënën një kompani në Michigan që prodhon “disqe alumini” për disa nga gjigantët e automobilave në botë.
Sipas USAToday, përcjell Telegrafi, zëdhënësja e FBI-së, Mara Schneider, tha të hënën në mëngjes, FBI-ja ekzekutoi një urdhër kontrolli në Dicastal America North në Greenville, Michigan.
Por Schneider nuk dha detaje të tjera përveç se hetimi është në vazhdim.
Dhe lajmi për bastisjen e FBI-së kapi në befasi disa prodhues automjetesh.
Zëdhënësi i General Motors, David Barnas tha, "Ne po monitorojmë situatën, por nuk presim asnjë ndikim në prodhimin e automjeteve GM".
Sipas faqes së saj të internetit, Dicastal North America ka prodhuar “disqe alumini” për industrinë e automjeteve që nga viti 2014.
Ajo është një degë e CITIC Dicastal Co. me bazë në Kinë, e cila e quan veten "furnizuesi më i madh në botë i ‘disqeve të aluminit’" dhe ofron produkte për prodhuesit e pajisjeve origjinale (OEM) në mbarë botën. /Telegrafi/