Me mbi 6,000 seriale dhe filma të disponueshëm vetëm në versionin britanik të platformës, shumë përdorues kanë kërkuar të dinë se cili është seriali që ata e konsiderojnë më të nënvlerësuarin.
Një përdorues i Reddit në forumin Netflix pyeti: “Cili është seriali më i nënvlerësuar që keni zbuluar në Netflix?”
Ai shtoi: “Shpesh më ndodh të ndeshem në një serial për të cilin s’kam dëgjuar kurrë dhe përfundoj duke e dashuruar shumë më tepër nga sa prisja. Jam kurioz të di nëse edhe të tjerët e kanë pasur këtë përvojë. Cili është seriali më i nënvlerësuar që keni zbuluar në Netflix dhe mendoni se më shumë njerëz duhet ta shohin?”.
Një nga sugjerimet që mori shumë mbështetje ishte drama me tetë episode "Unbelievable", e bazuar në një histori të vërtetë, shkruan DailyMail.
Ky serial u publikua në Netflix në vitin 2019 dhe ka në rolet kryesore Toni Collette, Merritt Wever dhe Kaitlyn Dever.
Sipas përshkrimit të IMDb: “Një adoleshente akuzohet se ka gënjyer për një përdhunim, por dy detektive vendosin të ndjekin të vërtetën”.
Komentet e përdoruesve ishin entuziaste: “E adhuroj këtë serial. Personazhe të shkëlqyer”, “Një shfaqje absolutisht e jashtëzakonshme me aktrim fantastik. E kam parë disa herë, edhe pse është e vështirë për t’u parë”, “Depresuese dhe e mrekullueshme njëkohësisht”, “Edhe unë doja të sugjeroja Unbelievable!” dhe “Është me të vërtetë e rëndë për t’u ndjekur. Unë nuk munda ta përfundoja, jo se ishte i dobët, por sepse ishte shumë i rëndë”.
Në fakt, seriali ka fituar vlerësime të larta edhe kritikisht.
“Me 98% vlerësim në Rotten Tomatoes, i nominuar për disa Emmy dhe Golden Globes, si dhe fitues i çmimeve Peabody dhe Critic’s Choice, në të vërtetë nuk mund të quhet i nënvlerësuar. Por mbetet një serial fantastik!” – shkroi një tjetër komentues.
Në serial, Toni Collette luan rolin e detektives Grace Rasmussen, Merritt Wever është detektivja Karen Duvall, ndërsa Kaitlyn Dever portretizon protagonistën dhe të mbijetuarën e sulmit seksual, Marie Adler.
Në kast bëjnë pjesë gjithashtu Eric Lange, Bill Fagerbakke, Elizabeth Marvel, Bridet Everett, Danielle Macdonald dhe Dale Dickey.
Duke folur për rolin e saj, Kaitlyn Dever i tha Entertainment Weekly: “Kur them se ishte gjëja më e vështirë që kam bërë, është sepse pas xhirimeve më duhej të merrja pak kohë për veten, për të reflektuar mbi Marin. Ishte zemërthyese gjatë gjithë kohës. Çdo skenë tregonte një vajzë që, edhe pas sulmit, vazhdonte të përballej me vështirësi dhe dhimbje. Edhe para sulmit, ajo kishte një jetë shumë të vështirë. Gjatë gjithë serialit, më dhimbte zemra për të”.
Aktorja shtoi: “Jam e lumtur që po tregojmë gjithnjë e më shumë histori të tilla të rëndësishme, duke u dhënë zë atyre që janë lënë në heshtje. Kjo është arsyeja pse ndihem krenare të jem aktore – të jem qoftë edhe një pjesë e vogël në ndriçimin e historive që dikur u fshehën”. /Telegrafi/