John Bailey, presidenti i Akademisë amerikane të arteve filmike dhe shkencave (AMPAS), që qëndron prapa çmimeve Oscar, është akuzuar për keqtrajtim seksual - bën të ditur BBC.Hollywood Reporter dhe Variety kanë raportuar më herët se Akademia tashmë i ka nisur hetimet, duke qenë se ndaj tij janë bërë tri akuza për abuzim seksual.
Bailey ishte zgjedhur president i AMPAS-it në gusht të vitit të kaluar. Mandatin katërvjeçar e kishte marrë pak para se të shpërthente skandali për keqtrajtimet seksuale në Hollywood.
Derisa po vazhdojnë hetimet, as Akademia e as kreu i saj nuk kanë dashur të komentojnë në lidhje me akuzat ndaj tij.
Filmbërësi 75 vjeçar është i njohur në mes tjerash edhe për filmat, "American Gigolo", "The Big Chill" e "Groundhog Day".
Në vitin 2015 kishte marrë çmimin për vepër jetësore nga Shoqata Amerikane e Kinematografëve.
Kujtojmë se dhjetëra femra kanë ngritur akuza ndaj producentëve, aktorëve dhe filmbërësve për keqtrajtime seksuale në Hollywood. Madje disa akuza janë ngritur edhe për përdhunime. /Telegrafi/