Disa fermerë në disa lokalitete të komunës së Shtimes po ankohen se sivjet u ka dështuar zhvillimi i kulturës së grurit pasi që pretendojnë se një barnatore bujqësore në këtë qytezë ua kishte shitur pesticidet e prishura. Deri në 20 hektarë është dëmi i cili u është shkaktuar atyre nga ky preparat të cilin e kishin blerë për t’i larguar barishtet, por ai kishte vepruar në anën e kundër duke ua dëmtuar grurin.
Fermerët janë ankuar se shitësi i barnatores bujqësore nuk ka dashur të bashkëbisedon për të gjetur një zgjidhje, andaj kanë paralajmëruar padi në gjykatë.
Skender Azizi fermer nga fshati Davidoc ka thënë për Telegrafin se pesticidet të cilat i ka blerë në një barnatore bujqësore në Shtime ua kishte dëmtuar mbi 5 hektar të kulturës së grurit. Ai dyshon se preparati ishte i prishur dhe e ka dëmtuar kulturën e grurit në vend se t’i dëmtonte barishtet e panevojshme.
“Jemi shumë të dëmtuar me këto pesticide të cilat i kemi blerë në një barnatore bujqësore në Shtime. Personalisht jam dëmtuar me 5 hektar, kurse sipas ankesave të fermerëve të tjerë ky dëm arrin deri në 20 hektar. Ka qenë koha që ne t’i spërkatim tokat bujqësore me kulturën e grurit por këto pesticide e kanë dëmtuar grurin dhe jemi shumë të shqetësuar. Kemi biseduar me pronarin e barnatores bujqësore nga i cili i kemi blerë këto pesticide, por ai nuk ka dashur të merret me hallet tona. Qëllimi i tij kishte qenë vetëm që t’i shes ato dhe mos të garanton për cilësi”, është ankuar Azizi.
Ai sqaron se kanë kërkuar kompensim nga pronari i barnatores bujqësore, por nuk u është përgjigjur.
“Ne do t’i drejtohemi gjykatës sepse pronari përgjegjës që i ka shitur këto preparate nuk ka dashur të përgjigjet”, ka thënë më tej Azizi.
Ndërkaq, Imer Bajrami fermer nga Reçaku, ka thënë për Telegrafin se kanë shqetësime të mëdha lidhur me dëmtimet që u janë shkaktuar në kulturën e grurit.
“Të gjithë ata fermer që i kanë blerë pesticidet në të njëjtën barnatore bujqësore, janë dëmtuar dhe nuk do të kenë rendimente të grurit. Kjo për shkak se gruri është tharë në vend që të thahet bari ashtu siç përshkruhet në paketimin e pesticideve. Ne i kemi blerë ato preparate për të mirë, por tash doli e kundërta dhe jemi dëmtuar shumë, prandaj kemi kërkuar kompensim nga shitësi, mirëpo nuk ka dashur të dëgjon shqetësimet tona”, ka thënë Bajrami.
Në anën tjetër Telegrafi, ka kontaktuar nëpërmjet telefonit edhe me pronarin e barnatores bujqësore që ua kishte shitur pesticidet fermerëve.
Ai (O.B) ka thënë se nuk dëshiron të flas para kamerës, por ka sqaruar se fermerët prej më shumë se tre vjet po e kërkojnë të njëjtat pesticide për zhvillimin kulturës së grurit, andaj arsyetohet se nuk i ka prodhuar ato.
“Banorët janë të shqetësuar por vetë e kanë kërkuar këtë preparat, ne jemi marrë vesh me banorët se do të deklarohemi në gjykatë. Unë nuk jam prodhues i pesticideve dhe ata e dinë mirë këtë çështje”, ka thënë ai./Telegrafi/
