Amerikanët e liruar nga burgjet ruse sipas marrëveshjes historike të shkëmbimit kthehen në SHBA

Raportohet se tre amerikanë të liruar nga burgjet ruse në bazë të një marrëveshjeje shkëmbimi historik kanë mbërritur në SHBA.

Evan Gershkovich, Alsu Kurmasheva dhe Paul Whelan ishin pjesë e një marrëveshjeje që liroi 24 persona në shkëmbimin më të madh të të burgosurve midis Rusisë dhe Perëndimit që nga Lufta e Ftohtë.

Ata u mirëpritën në bazën e përbashkët Andrews, në Maryland, nga presidenti i SHBA-së Joe Biden dhe zëvendëspresidentja Kamala Harris.

Fotot e publikuara në rrjete sociale tregojnë momentin emocional kur të burgosurit amerikanë u ribashkuan me familjet e tyre.

Gazetari i Wall Street Journal Gershkovich shihej duke përqafuar nënën e tij Ella Milman dhe Kurmasheva pati një ribashkim emocional me burrin e saj Pavel Butorin dhe vajzat Miriam Butorin dhe Bibi Butorin.

Bëhet e ditur se ata shkrepën foto me anëtarët e familjes dhe miqtë, si dhe u përqafuan me Bidenin dhe Harrisin.

Harris tha se ishte “një ditë e jashtëzakonshme” dhe e vlerësoi rolin e Bidenit në shkëmbimin e të burgosurve, shkruan skynews, përcjell Telegrafi.

Ndërkohë, në një goditje ndaj kandidatit republikan për president Donald Trump, Harris tha: “Ky është një testament për të pasur një president që kupton fuqinë e diplomacisë”.

I pyetur për shqetësimet se marrëveshja mund të nxisë ndalimin e amerikanëve në Rusi, Biden tha: “Unë nuk e blej këtë ide që ju i lini këta njerëz të kalben në burg sepse njerëz të tjerë mund të kapen”.

Bëhet e ditur se shkëmbimi u negociua me Rusinë dhe disa vende të tjera në fshehtësi për më shumë se një vit.

Lexo po ashtu Shkëmbim i të burgosurve, Rusia liron dy gazetarë dhe një ish-marins amerikan

Kthimi i Gershkovich, Kurmashevas dhe Whelan vjen pasi 13 të arrestuarit e tjerë perëndimorë u dërguan në Gjermani mbrëmë.

Midis tyre ishte Vladimir Kara-Murza i cili u burgos për 25 vjet pasi u dënua për kritikimin e pushtimit të vendit në Ukrainë.

Tetë të burgosur rusë u liruan nga burgjet në SHBA, Gjermani, Norvegji, Slloveni dhe Poloni sipas marrëveshjes.

“Sot është një shembull i fuqishëm se pse është jetike të kesh miq në këtë botë”, tha Biden.

Gershkovich u arrestua dhe u ndalua fillimisht në mars të vitit 2023 pasi Rusia pretendoi se ai kishte “mbledhur informacion sekret” me urdhër të CIA-s.

Gershkovich tha se akuzat kundër tij ishin të rreme dhe punëdhënësi i tij e quajti rastin një mashtrim.

Ai u dënua me 16 vjet burg më parë këtë muaj nën akuzat për spiunazh në një gjyq që shihet gjerësisht si i motivuar politikisht.

Familja e Gershkovich tha në një deklaratë të lëshuar nga The Wall Street Journal se “mezi presin t’i japin atij përqafimin më të madh dhe të shohin nga afër buzëqeshjen e tij të ëmbël dhe të guximshme”.

Kurmasheva ka nënshtetësi ruse dhe amerikane dhe është gazetare për Radio Evropa e Lirë, një organizatë mediatike e financuar nga SHBA-ja.

Ajo u arrestua në qershor të vitit 2023 dhe më vonë u akuzua për përhapje të informacionit të rremë në lidhje me ushtrinë ruse, të cilën ajo e mohoi.

Muajin e kaluar, ajo u dënua me më shumë se gjashtë vjet burg.

Ish-marinari amerikan Whelan ishte në paraburgim në Rusi që kur u arrestua në një dhomë hoteli në Moskë më 28 dhjetor të vitit 2018.

Ai u dënua me 16 vjet burg të sigurisë së lartë nën akuzat për spiunazh.

E në këmbim të lirimit të personave si Gershkovich, Kurmasheva dhe Whelan, shtetasit rusë u liruan në anën tjetër.

Kjo përfshinte Vadim Krasikov, i cili u dënua në Gjermani në vitin 2021 me burgim të përjetshëm për vrasjen e një ish-rebeli çeçen në një park të Berlinit. /Telegrafi/