Ambasadori amerikan, Donald Lu, mesazh të rinjve: Kërkoni miratimin e reformës në drejtësi

Ambasadori i SHBA-ve Donald Lu u ka bërë thirrje të rinjve shqiptarë që t’i kërkojnë politikës që të miratojë reformën në drejtësi. Në një mesazh me titull “Një thirrje për brezin e ri të Shqipërisë”, Lu shprehet se populli shqiptar është i lodhur me lojërat politike, prandaj duhet të miratohet reforma në drejtësi.

“Është e vërtetë që Z. Rama dhe Z. Basha u përpoqën ta bënin këtë më 6 qershor. Ata dështuan në arritjen e një marrëveshjeje. Tre herë që prej 4 majit, Shtetet e Bashkuara dhe Bashkimi Evropian kanë ofruar propozime të arsyeshme kompromisi. Mazhoranca i ka pranuar këto propozime. Z. Basha ka gjetur gjithmonë diçka për të refuzuar”.

“Unë kam një kërkesë për brezin e ri të shqiptarëve. Ju bëj thirrje të gjithëve që t’u thoni udhëheqësve që ju keni votuar se e doni këtë reformë. Shkruajini një letër. Bëni postime në median sociale. Flisni me miqtë tuaj. Vota e 21 korrikut do të përcaktojë drejtimin e vendit. Bëjuni me dije udhëheqësve tuaj se doni të rriteni në një vend të lirë nga gjykatësit dhe prokurorët e korruptuar. Thuajuni atyre se doni që Shqipëria të jetë një demokraci ku zërat tuaj do dëgjohen dhe ku ju do të trajtoheni në mënyrë të drejtë dhe me respekt”.

Lu thotë se udhëheqësit politike ndoshta kanë frikë nga reforma në drejtësi. Ai i bën thirrje deputetëve të Kuvendit që të marrin përgjegjësinë dhe ta votojnë atë në 21 korrik./Telegrafi/