Abdixhiku e Selmanaj sot i bashkohen LDK-së, pritet edhe koalicioni me “Alternativa”-n

Një koalicion parazgjedhor pritet të arrihet sot në mes të Lidhjes Demokratike të Kosovës dhe subjektit më të ri politik “Alternativa”.

Burime të Express mësojnë se gjatë ditës së sotme LDK-ja do t’i prezantojë edhe aderimet e reja.

Sipas të njëjtit burim, deri në mesditë pritet që kësaj partie t’i bashkohet njohësi i çështjeve ekonomike Lumir Abdixhiku.

Abdixhiku do ta zyrtarizojë sot aderimin në Lidhjen Demokratike të Kosovës.

Tash e disa ditë në media u raportua për këtë aderim të Abdixhikut, pas një takimi që ky i fundit kishte pasur me kryetarin e LDK-së, Isa Mustafën, por nuk kishte asgjë zyrtare. Por ky nuk është aderimi i vetëm.

E bashkë me Abdixhikun, LDK-së do t’i bashkohet edhe analisti Driton Selmanaj dhe disa të rinj.

Selmanaj është pjesë e shoqërisë civile dhe analist në njërin prej televizioneve nacionale.

Ka mbajtur qëndrim kritik sidomos ndaj PDK-së derisa ishte pjesë e debateve.

Kanë mbetur edhe më pak se një muaj prej kur pritet të mbahen zgjedhjet nacionale pasi, ka rënë Qeveria e ndërtuar nga PDK-ja e LDK-ja.