Agim Ademi flet pas ardhjes së Florent Muslijës: Një dardan iu bashkëngjit Dardanëve

Kryetari i Federatës së Futbollit të Kosovës, Agim Ademi ka folur për ardhjen e Florent Muslijës te Kosova.

Ademi ka thënë që është shumë i lumtur që Florent Muslija ka pranuar t’i bashkohet Përfaqësueses së Kosovës.

“Sot jam shumë i lumtur që iu bashkëngjit një dardan ekipit tone të dardanëve. Ky është Florent Musliu një futbollist të cilit i dihen kualitetet e tij dhe më gëzon fakti që familja e tij dhe ky vet janë dhe kanë qenë të interesuar t’i bashkohen Kosovës dhe të japin kontributin e tyre që Kosova të arrijë rezultate sa më të mira”, deklaroi Agim Ademi.

Numri një i Federatës së Futbollit të Kosovës, ka falënderuar edhe Fehmi Kongjelin si dhe Besim Zenelin që kanë bërë punën më të madhe që Muslija t’i thotë po Kosovës.

“Natyrisht që një falënderim shkon edhe për Fehmi Kongjelin i cili bashkërisht me Besim Zenelin që kanë qenë ata promotorët që kanë biseduar me Florentin dhe kanë ardhë deri këtu ku sot ne e nënshkruajmë marrëveshjen dhe jemi bashkërisht me “Dardanët”, tha ai.

Ademi ka thënë që pas Florent Muslijës shpreson që edhe futbollistë të tjerë të pranojnë të luajnë për Kosovën.

“Shpresoj dhe besoj që rrugës së Florentit do të shkojnë edhe talent të tjerë të cilët janë me prejardhje nga Kosova dhe faktikisht do ta bëjnë Kosovën atë që ne e kemi ëndërr”.

“Ne Dardanët do të vazhdojmë me krenari dhe përgjegjësi dhe Florentit i uroj suksese, shëndet dhe të gjitha të mirat në ekipin tonë. Urime Florent! Faleminderit që e zgjedhe Kosovën”, ka përfunduar Ademi. /Telegrafi/