Afrim Gashi takoi ambasadoren amerikane: RMV duhet të ecë drejt standardeve evropiane

Kryetari i Alternativës Afrim Gashi, sot ka realizuar takim me ambasadoren amerikane Angela Aggeler. Siç njoftojnë nga Alternativa, Gashi dhe ambasadorja Aggeler u pajtuan bashkërisht se ndajnë vizionin e njëjtë për ardhmërinë e vendit.

Në njoftim thuhet se në takim “ata riafirmuan përkushtimin e përbashkët për ta parë vendin duke ecur përpara drejt BE-së dhe standardeve evropiane në shoqëri, siç është sundimi i së drejtës. Biseduan për planet për përshpejtimin e integrimit në BE, përfshirë opsionet për të zhbllokuar negociatat me BE-në nëpërmjet ndryshimeve kushtetuese”.

“Të dy palët u pajtuan se të gjithë faktorët politikë duhet të përkrahin rrugën drejt BE-së dhe të vendosin qytetarët në vend të parë, në një përpjekje për të siguruar ardhmëri më të mirë për të gjithë”.

“Kryetari Afrim Gashi prezantoi nismën e Alternativa-s për dorëzimin e një amendamenti kushtetues i cili do të përjashtonte parashkrimin penal për korrupsionin politik, gjegjësisht do të parandalonte mosndëshkimin e korrupsionit të lidhur me politikën. Kjo nismë duhet të tejkalojë diskursin etnik dhe të fokusohet në sundimin e së drejtës si prioritet për gjithë shoqërinë. Kryetari Gashi kërkoi mbështetjen e ShBA-së për këtë amendament, pasi është një prej hapave më të mëdhenj të propozuar deri tani, me synim direkt për të luftuar korrupsionin politik”, thuhet në njoftimin e Alternativës./Telegrafi/